Azərbaycanda uzun müddətdir plastik cərrahların fəaliyyəti ilə bağlı aparılan rəsmi araşdırma ötən həftə yekunlaşıb. Rəsmi məlumatda bildirilir ki, praktik tibb fəaliyyəti ilə məşğul olan plastik cərrahların peşə fəaliyyətinin qanuni əsaslarının kompleks şəkildə yoxlanılması məqsədilə Səhiyyə Nazirliyi, Baş Prokurorluq, Daxili İşlər Nazirliyi və Elm və Təhsil Nazirliyinin nümayəndələrindən ibarət Xüsusi Təftiş Komissiyası yaradılıb. Araşdırmanın nəticəsində yalnız 42 nəfər plastik cərrahın fəaliyyətinə rəsmi icazə verilib.
Bu açıqlama plastik cərrahiyyə sahəsində çalışanların sayının əhəmiyyətli dərəcədə azaldığını göstərir. Mütəxəssislər bildirir ki, bu qərar həm pasiyentlərin təhlükəsizliyi baxımından müsbət addımdır, həm də qeyri-leqal və savadsız müdaxilələrin qarşısını almağa yönəlib.
Lakin bu məhdudiyyət ölkədə plastik əməliyyatlara tələbatın artdığı dövrdə ciddi çatışmazlığa səbəb ola bilər. Artıq bir sıra klinikalar bəzi prosedurlar üzrə növbələrin uzandığı, qiymətlərin artdığı bildirilir.
Azərbaycanda hazırkı göstəriciyə görə, 1 milyon nəfərə təxminən 4 plastik cərrah düşür, bu da beynəlxalq göstəricilərlə müqayisədə olduqca aşağıdır. Müqayisə üçün qeyd edək ki, Cənubi Koreyada hər 100 min nəfərə 5-dən çox plastik cərrah düşür. ABŞ-da isə bu göstərici 2,2-dir.
Ekspertlər bildirir ki, gələcəkdə yerli tibbi təhsil sistemində plastik cərrahiyyə üzrə ixtisaslaşmanın gücləndirilməsi və xaricdə təhsil almış həkimlərin lisenziyalaşdırma prosesinin şəffaflaşdırılması bu sahənin inkişafı üçün vacibdir. Digər tərəfdən, sosial mediada geniş yayılan "estetik müdaxilə" trendləri tələbatı daha da artırır.
Yeni qərar həm də bir çox özəl estetik mərkəzlərin fəaliyyətinə hüquqi baxımdan təsir göstərəcək. Əksər hallarda bu mərkəzlər qeyri-peşəkar şəxslərin xidmətlərindən istifadə edirdi ki, bu da ciddi sağlamlıq riskləri yaradırdı.
Modern.az mövzu ilə bağlı fəaliyyətinə icazə verilən palstik cərrah Araz Salmanovla həmsöhbət olub.
O qeyd edib ki, Səhiyyə Nazirliyi tərəfindən həyata keçirilən genişmiqyaslı yoxlama çox yaxşı bir məqsədə xidmət edir:
“Plastik cərrahiyyədə hədsiz dərəcədə saxtakar, bilik və təcrübəsi yetərli olmayan çoxlu sayda insan var. Hansı ki, o insanları araşdıranda ya həmin ixtisasa malik olmadığı, ya da ümumiyyətlə həkim olmadığı məlum olur. Qəbul edərsiniz ki, professional olmayan şəxsin tibb, cərrahiyyə məşğul olması yanlışdır. Burada say əhəmiyyətli deyil. Birinci yerdə əsasən keyfiyyət dayanır. Keyfiyyətli tibbi xidməti isə sadəcə yüksək ixtisaslı, yüksək biliyə sahib plastik cərrah verə bilər. Bu mənada Səhiyyə Nazirliyinin həyata keçirmiş olduğu tədbir çox yaxşıdır. İlk növbədə Azərbaycan vətəndaşının xeyrinə, sağlamlığına xidmət edir”.
Bəs 42 plastik cərrah ölkəmiz üçün kifayətdirmi?
Müsahibimiz Azərbaycan kimi kiçik ölkə üçün 42 plastik cərrahın az olduğunu düşünmür:
“Orta hesabla 100 min nəfərə 1 nəfər plastik cərrah normal saydır. Nəzərə alsaq ki, ölkəmizdə rekonstruktiv cərrahiyyəyə gələn pasiyentlərin sayı məhduddur, əksəriyyəti estetikaya gəlir, 42 cərrah artıqdır. Plastik əməliyyatların yarıdan çoxunu digər ixtisas həkimləri həyata keçirir. Bu gün Azərbaycandakı rinoplastikaların yarıdan çoxunu lor cərrahlar həyata keçirir, yada abdominoplastikaların böyük hissəsini ümumi cərrahlar həyata keçirir, yaxud oftlmoloqlar göz ətrafı nahiyənin estetik cərrahiyyəsi ilə məşğuldurlar, ginekoloqlar vaginal nahiyənin estetik əməliyyatlarını həyata keçirirlər. Əslində heç də həkim qıtlığı yoxdur, əksinə böyük bir təmizləmə həyata keçirildi. Buradan qazanan Azərbaycan vətəndaşıdır, hansı ki, yüksək keyfiyyətli xidmət alacaqlar”.
“Çox istərdim ki, sadəcə plastik cərrahiyyə yox, tibbin bütün sahələri üzrə bu şəkildə təmizəmə həyata keçirilsin. Düşünməyin ki, belə saxtakarlıqlar, ixtisasla əlaqədar aldatmalar sadəcə plastik cərrahiyyədə var. Digər sahələrdə də külli miqdar saxtakatlıq mövcuddur. Ən sadəsini desək, Azərbaycanda diş həkimi deyə işləyənlərin əksəriyyəti orta diş texnikləridir. Bunun da zərbəsi vətəndaşa dəyir. Tibb strateji sahədir, insanların sağlamlığını bazara çevirnək olmaz. Buradan yaranan problemlər hər birimizə dəyir, kimsə düşünməsin ki, məsələdən kənardadır. Hamımız Azərbaycanda yaşayırıq, istənilən vətəndaş saxtakarlığın qurbanı ola bilər”
