"Ədalət Partiyası Siyasi Şurasının qərarına əsasən, aprelin 19-da Ali Məclisin növbəti iclası keçirilib. Ali Məclisin rəhbərliyində təmsil olunan bir neçə şəxsin əvvəlcədən planlaşdırılmış şəkildə Nizamnamə tələblərini pozaraq, şəxsi maraqları naminə Siyasi Şuranın qərarına etinasızlıq, partiya üzvlərinə isə hörmətsizlik göstərməsi, iclasda iştirak etməməsi, bununla da Qurultayın çağırılması qərarını pozmağa çalışması təəssüf doğurur".
Bunu Modern.az-a açıqlamasında Ədalət Partiyasının sədr müavini Mütəllim Rəhimli bildirib.
O qeyd edib ki, iclasın baş tutmasını istəməyənlər gecə ilə partiyanın mərkəz qərargahının qapısının qıfılını dəyişiblər:
"Ali Məclis üzvləri çox təəssüflə bildirirlər ki, partiyanın siyasi simasının zədələnməsinə, ideoloji platformasının, etik və əxlaqi dəyərlərinin əleyhinə çıxan bu şəxslər iclasın baş tutmaması üçün məqsədyönlü iş aparıb, sağlam mübarizə yolunu seçməkdənsə, gecə ikən partiyanın mərkəzi qərargahının qapısının kilidini dəyişməklə iclasın baş tutmasına mane olmağa çalışıblar. Təbii ki, onların bu qanunsuz əməlləri, Ali Məclisin iclasının keçirilməsinə mane ola bilməyib. Əksinə, Məclis üzvlərinin 86 faizi (56 rayon təşkilatından 50 nəfər və qurultayda seçilmiş üzvlərdən 6 nəfər) iclasda iştirak edərək Ədalət Partiyasının IX Qurultayının 17 may 2025-ci il tarixində keçirilməsi barədə yekdilliklə qərar qəbul edib".
M.Rəhimli Ali Məclisin üzvlərinə qarşı bir neçə şəxsin sayğısız hərəkətlərini partiyadaxili siyasi münasibətlərə, həmkarlığa, ideoloji birliyə zidd addım sayıb və bunun yolverilməz olduğunu deyib:
"Partiya bütün davranışların Nizamnaməyə, qanunvericiliyə və milli-mənəvi, əxlaqi dəyərlərə uyğun qurulmasının alternativi olmadığını bildirir.
Ali Məclis partiyada təmsil olunan hər kəsi iddialarını Nizamnaməyə uyğun olaraq təmin etmək üçün lazımı prosedurlara əməl etməyə çağırır.
Ali Məclis bəyan edir ki, artıq qurultaya hazırlıq üzrə Təşkilat Komitəsi seçilib və partiyanın bütün strukturlarının səlahiyyətləri ona verilib. Buna görə də Ali Məclis üzvləri rəhbərlikdə təmsil olunan və pozuculuqla məşğul olan bir neçə şəxsi, eləcə də Xəzər və Xətai rayon təşkilatlarının sədrlərini partiyadaxili həmrəyliyə çağırır, partiyanın qurultayında iştirak etməklə, öz təkliflərini və namizədlərini irəli sürmək hüququna malik olduqlarını bildirir.
Ali Məclis Ədalət Partiyasının yaradıcısı və ilk sədri, hüquq elmləri doktoru İlyas İsmayılovun siyasi irsinin, ideoloji baxışlarının davamçısı olaraq hər kəsi, o cümlədən, yalançı vədlərlə aldadılmaqda olan bir neçə üzvü səhv yoldan dönməyə, partiyanın inkişafına dəstək verməyə, qayda-qanunları, Nizamnamə tələblərini pozmaqdan çəkinməyə, partiyanın birliyini qorumağa və hər bir situasiyada ədalətli olmağa çağırır".
