REAL partiyasının sədri, iqtisadçı ekspert Natiq Cəfərli Azərbaycan Yerüstü Nəqliyyat Agentliyinin qanunsuz cərimə yazdığını iddia edir.
O, parkinq xidmətindən istifadə etmədiyi halda AYNA tərəfindən 20 manat cərimələndiyini deyir. Bu barədə sosial şəbəkə hesabında paylaşım edən siyasətçi AYNA-nın aprelin 19-da yazdığı inzibati protokolla bağlı məhkəməyə müraciət edəcəyini bildirib: "İnsanları bezdirən, yığdığı vəsait haqqında ictimai məlumat verməyən, yığdığını kefi istədiyi kimi xərcləyən AYNA, sizdən mesaj aldım, bugünkü tarixdir. Bu gün maşını heç yerdə saxlamamışam, evdən çıxıb ofisə gəlib, ofisin qarşısında park etmişəm. Ofisin qarşısı binaya aiddir, şlaqbaumla daxil olmaq olur, maşın 7 saatdır ofisin qarşısındadır".
Natiq Cəfərli daha sonra Modern.az-a bildirib ki, AYNA mətbuat xidmətinin rəhbəri onunla əlaqə saxlayıb və texniki xəta olduğunu deyib.
"Xəta ondan ibarət olub ki, daha əvvəlcədən yazılmış cərimə daha gec tarixdə göndərilib. Yəni cərimə həmin günə aid olmayıb. İkinci bir məsələ yerlə bağlı olub. Mən onlara məndə olan tətbiqdəki ekran görüntülərini göndərdim. Orada saat fərqi var idi. O barədə də araşdıraraq geri dönüş edəcəklərini bildirdilər".
