Türkiyə Səhiyyə Nazirliyi təbii doğuşu təşviq etmək məqsədilə yeni qərar verib. Yeni qaydalara əsasən, özəl səhiyyə müəssisələrində tibbi zərurət olmadan keysəriyyə əməliyyatlarına icazə verilməyəcək.

Qərar təkcə tibb mərkəzlərini deyil, poliklinikaları, müayinəxanaları və digər özəl səhiyyə müəssisələrini də əhatə edir. Yeni dövrdə bu müəssisələrdə planlı keysəriyyə əməliyyatlarının yalnız tibbi göstəriş olduqda aparılmasına icazə veriləcək. 

Azərbaycan da keysəriyyə əməliyyatlarına görə, ortalamanın üzərində yer alan ölkələrdəndir. Azərbaycanda keysəriyyə əməliyyatları ümumi doğuşların 32%-ni əhatə edir.

Modern.az mövzu ilə bağlı Səhiyyə Nazirliyi Elmi-Tədqiqat Mamalıq və Ginekologiya İnstitutunun həkim mama ginekoloqu Aynurə Əmirova ilə həmsöhbət olub.

Onun sözlərinə görə, keysəriyyə kəsiyi əməliyyatı uşaqlıq üzərində kəsiyin aparılması ilə doğuşun abdominal yolla başa çatdırılması deməkdir:

“Müasir dövrdə bütün ölkələrdə keysəriyyə əməliyyatının sayının artması qeyd olunur və müxtəlif ölkələrdə diri doğuşların 5%-dən 50%-ə qədərini təşkil edir. Keysəriyyə əməliyyatlarının sayının artması hesabına perinatal itkilərin azalması yalnız müəyyən həddə qədər mümkündür. Göstərişlərin sayının artması da buna səbəb kimi göstərilə bilər. Ümumdünya Səhiyyə Təşkilatının 2009-cu il tövsiyələrinə əsasən keysəriyyə kəsiyinin sayı doğuşların ümumi sayının 15%-dən yuxarı olduqda perinatal itkilərin azalmasına təsir göstərmir. Ana tərəfindən əsas göstəricilər arasında uşaqlıq üzərində çapığın olması, döl tərəfindən isə dölün kəskin hipoksiyası, dölün distresini qeyd etmək olar. Əgər hamilədə cift gəlişi varsa və yaxud da normal yerləşmiş ciftin hissəvi ayrılması qanaxma kimi cift tərəfdən olan patoloji vəziyyətlə üz-üzə qalınırsa, bu zaman hamiləliyin cərrahi yolla sonlandırılması ananın həyatını xilas etmək üçün bir göstəriş hesab edilir. Onu da qeyd etmək lazımdır ki, bütün dünyada artımda olan keysəriyyə kəsiyi əməliyyatlarının faizini azaltmaq üçün lüzumsuz və göstərişsiz olan keysəriyyə kəsiklərinin sayının azaldılması yönündə tədbirlər görülür. İlk tədbirlərdən olan “Robson” təsnifatının sırf keysəriyyə kəsiyinin azaldılması üçün tətbiqi tövsiyə olunur”.

Müsahibimiz bildirib ki, Türkiyədə özəl klinikalarda keysəriyyə kəsiyinin qadının istəyi ilə icrasının nəzərdə tutulması kimi tendensiyaların mövcudluğundan irəli gələrək uşaqlıq üzərində qoyulan çapıq toxuması növbəti hamiləliyin də əksər hallarda əməliyyatla başa çatdırılması və yaxud da təbii doğuş olarsa riskli doğuşun olma ehtimalını yüksəldir:

“Azərbaycan Respublikası Səhiyyə Nazirliyinin müvafiq protokoluna əsasən əgər uşaqlıq üzərində çapıq varsa qadın mütləq şəkildə təkrar əməliyyat olunmalıdır. Kliniki protokola görə qadının istəyi ilə keysəriyyə əməliyyatının icrasına icazə yoxdur, yalnız tibbi göstəriş mövcuddursa, keysəriyyə kəsiyi əməliyyatının icrası mümkündür”.