Milli Məclisdə çoxuşaqlı ailə anlayışında uşaq sayının 5-dən 3-ə endirilməsi ilə bağlı müzakirələr gedir.

Bunu Modern.az-a açıqlamasında Bakı Dövlət Univertsitetinin Sosial elmlər və psixologiya fakültəsinin Sosial iş kafedrasının müdiri Üzeyir Şəfiyev deyib.

O qeyd edib ki, ölkəmizdə son bir neçə ildə təbii artımda ləngimə müşahidə olunur: "Ona görə də bu ləngimənin qarşısını almaq üçün demoqrafik təşviqedici dəstək aləti kimi bu layihə gündəmə gətirilir".

Sosioloq qeyd edib ki, bu baş tutarsa, 3 uşaqlı ailələrə də 5 uşaqlılara olduğu kimi imtiyazlar şamil oluna bilər:

“Buraya 105 manat müavinət və digər əlavə imtiyazlar aiddir. Eyni zamanda burada ana da daha tez pensiyaya çıxmaq şansı əldə edə bilir. Bu və digər imtiyazlar ailə planlamasında uşaq sayının artmasına da gətirib çıxara bilər. İndiki halda ailə planlamasında 2 uşaqlı ailələr üstünlük təşkil edir. Amma çoxuşaqlı ailədə say endirilərsə, ailə planlamasında uşaq sayı 3-ə köklənəcək”.

Üzeyir Şəfiyevin sözlərinə görə, bu layihənin müsbət tərəfləri çoxdur: "Həm demoqrafik təşviq, həm də sosial rifahın yaxşılaşdırılması baxımından bu düzgün addımdır. Bu qanun səviyyəsində öz təsdiqini taparsa, təbii artıma kömək edəcək və ailələrin rifahına müsbət təsir edəcək".