Rusiya prezidenti Vladimir Putinin varisi məsələsi yenidən müzakirə edilməyə başlanılıb. Müzakirələrin yenidən qızışmasına səbəb Putinin Rusiya mətbuatına bu barədə verdiyi açıqlama olub.
O qeyd edib ki, daim varisi barədə düşünür, lakin yekun seçimi xalq etməlidir. Putin deyib ki, ölkənin gələcəyini etibar etmək mümkün olan bir neçə şəxs önə çıxmalıdır. “Əgər namizədə xalqın etimadı yoxdursa, o zaman belə adam ciddi bir iş görə bilməz”, – Putin bildirib.
Jurnalist Pavel Zarubinin sualını cavablandıran Putin qeyd edib ki, o, daim potensial varisləri izləyir və onların keyfiyyətlərini qiymətləndirir.
Modern.az-ın məlumatına görə, Rusiya lideri konkret ad çəkməsə də, siyasi dairələrdə və beynəlxalq mətbuatda müxtəlif şəxslərin adı potensial varis kimi hallanır.
Ekspertlərə görə, Kremldə bu məsələ ilə bağlı müxtəlif ssenarilər nəzərdən keçirilir.
Adları çəkilən ilk şəxslərdən biri Aleksey Dyumindir. O, Putinin keçmiş şəxsi mühafizəçisi, Krımın ilhaqında iştirak edib və sonradan Tula vilayətinin qubernatoru olub. Hazırda Dövlət Şurasının katibi olan Dyumin siyasi və təhlükəsizlik dairələrində ciddi fiqur kimi qiymətləndirilir.
İkinci potensial namizəd isə Təhlükəsizlik Şurasının keçmiş katibi Nikolay Patruşevdir. Keçmiş FSB rəhbəri olan Patruşev sərt xətt tərəfdarı kimi tanınır və Qərbə qarşı düşmən mövqeyi ilə seçilir. Onun oğlu Dmitri Patruşevin də adı bu kontekstdə tez-tez hallanır. O, hazırda baş nazirin müavini postunu tutur və kənd təsərrüfatı naziri kimi fəaliyyət göstərib.
Kreml daxilində ideoloji nəzarətə görə məsul şəxslərdən biri Sergey Kiriyenkodur. O, prezident administrasiyasının rəhbərinin birinci müavinidir və uzun illərdir Kremlin informasiya siyasətinə yön verir. Ekspertlər onun idarəçilik təcrübəsini və sistemə sadiqliyini önə çəkirlər.
Baş nazir Mixail Mişustin də adları çəkilənlər sırasındadır. Onun texnokrat imici, iqtisadi idarəetmə təcrübəsi və siyasətdən uzaq durması bir tərəfdən üstünlük sayılsa da, xalq arasında populyarlıq baxımından zəif görünür.
Rusiyanın keçmiş müdafiə naziri Sergey Şoyqu və xarici işlər naziri Sergey Lavrov da uzun müddətdir hakimiyyətin əsas simalarından olsalar da, onların yaşı və son illərdəki fəaliyyətləri varislik ehtimalını zəiflədir.
Analitiklər qeyd edir ki, Putinin varisi yalnız siyasi bacarıqlara deyil, həm də şəxsi etimada və sistemə bağlılığa görə seçiləcək. 2000-ci ildən bu yana Putinin bu məsələdə ehtiyatla davrandığı və mümkün alternativləri illərlə müşahidə etdiyi məlumdur.
Bəzi şərhçilər hesab edir ki, Putin son anda gözlənilməz bir fiquru da irəli çəkə bilər – 2000-ci ildə Yeltsinin Putini seçməsi kimi. Buna görə də hazırkı proses həm Rusiya daxili, həm də beynəlxalq siyasət üçün diqqətlə izlənir.
Putinin hazırkı prezidentlik müddəti 2030-cu ildə başa çatacaq. Onun yenidən namizəd olub-olmayacağı, yaxud nə vaxt və necə siyasi səhnədən çəkiləcəyi hələlik qeyri-müəyyən qalır.
Lakin bir məsələ aydındır: Rusiya lideri varis məsələsini yalnız şəxsi istəyə deyil, həm də sistemin sabitliyinə əsaslanaraq həll etməyə çalışır. Prosesin davamı gələcək illərdə Kremlin strateji qərarları ilə müəyyənləşəcək.
Elnur Əmirov
