Azərbaycanın milli aviadaşıyıcısı “Azərbaycan Hava Yolları” QSC (AZAL) son illərdə yalnız sərnişin daşımalarında deyil, həm də beynəlxalq aviasiya sahəsində strateji mövqeyini möhkəmləndirib.
Müasir təyyarə parkının genişləndirilməsi, xidmət keyfiyyətinin artırılması və uçuşların təhlükəsizliyinin beynəlxalq standartlara uyğunlaşdırılması şirkətin uğurlarının əsasını təşkil edir.
AZAL-ın son illərdə ən ciddi uğurlarından biri də uçuş coğrafiyasını genişləndirməsidir.
Modern.az şirkətin neçə şəhərə birbaşa uçuş təşkil edilməsini öyrənmək üçün milli aviadaşıyıcı ilə əlaqə saxlayıb.
QSC-dən sorğumuza cavab olaraq bildirilib ki, AZAL hazırda Bakıdan 26 ölkəyə və ölkədaxili istiqamətlər də nəzərə alınmaqla (Naxçıvan və Füzuli) ümumilikdə 42 şəhərə birbaşa uçuşlar həyata keçirir. Qeyd edək ki, AZAL Naxçıvan-Gəncə-Naxçıvan marşrutu üzrə də reyslər yerinə yetirir.
Qeyd edək ki, AZAL bu gün təkcə Azərbaycan sərnişinin deyil, həm də regionun hava nəqliyyatı ehtiyaclarını qarşılamaq gücündə olan bir şirkətə çevrilib. Yuxarıdakı açıqlanan rəqəmlər bunu açıq şəkildə təsdiqləyir.
Həmçinin, AZAL mövsümi və çarter reysləri ilə də sərnişinlərinə fərqli səyahət alternativləri təklif edir. Turizm dövrlərində populyar istiqamətlərə əlavə reyslərin təşkili ölkəyə turist axınını artırmaqla yanaşı, Azərbaycan vətəndaşlarının da istirahət imkanlarını genişləndirir.
AZAL-ın məqsədi təkcə bugünkü ehtiyacları qarşılayan deyil, həm də gələcəyə hesablanmış hava nəqliyyatı sisteminin qurulmasıdır. Şirkət qarşıdakı dövrlərdə yeni istiqamətlərin xəritəyə əlavə olunacağını və bir sıra mövcud marşrutlarda təkmilləşdirmələr ediləcəyini bildirib.
"Aviaşirkət yeni istiqamətlər açmaqla və bir sıra şəhərlərə reyslərin tezliyini artırmaqla uçuş çoğrafiyasını genişləndirməyə və sərnişinlərə daha geniş səyahət imkanları təqdim etməyə davam edir", - rəsmi açıqlamada bildirilib.
Səmada daha geniş coğrafiyanı əhatə edən AZAL Azərbaycanın qlobal nəqliyyat xəritəsindəki yerini möhkəmləndirməyə davam edir. Bu isə ölkənin turizm, biznes və diplomatik imkanlarına da əlavə dinamika qazandırır. Gələcək illərdə daha çox şəhərin, daha çox ölkənin və daha çevik uçuş imkanlarının təqdim olunacağı gözlənilir.
