Türkiyədən bir qrup deputat və Şimali Kipr nümayəndələri Bakıya gəliblər.
Modern.az-ın əldə etdiyi məlumata görə, Türkiyə-Azərbaycan Dostluq Qrupunun sədri Şamil Ayrım, Türkiyə-Şimali Kipr Türk Respublikası Dostluq Qrupunun sədri Orhan Erdem, eləcə də Şimali Kiprdə fəaliyyət göstərən Doğu Akdeniz Universitetinin rektoru Hasan Kılıç, Şimali Kipr Prezidentinin siyasi məsələlər üzrə müşaviri Anıl Kaya Azərbayanda səfərdədirlər.
Onlar Bakıda mühüm görüşlər keçirəcəklər.
Nümayəndə heyətinin tərkibinə daxil olan Orhan Erdem saytımıza açıqlamasında bildirib ki, əsasən universitetlərdə görüşlər keçiriləcək.
O bildirib ki, bu gün 3 universitetdə görüşləri olacaq:
"ADA Universitetində, Azərbaycan Universitetində, UNEC-də görüşlər keçirəcəyik. İki ölkənin tələbə mübadiləsi, Şimali Kiprin dünyada tanınan 25 məşhur universitetini tələbələrin tanıması, qarşılıqlı imkanlar, təhsil razılaşması kimi məsələlər üzrə müzakirələr aparacağıq".
"Azərbaycanlı tələbələr daha keyfiyyətli və ucuz təhsil ala bilərlər"
"Cənab Prezident İlham Əliyev ADA Universitetində görüş keçirmişdi. O, burada çıxışı zamanı önəmli rəqəmlər açıqlayıb. İnşallah universitetlər bu sahədə protokollar imzalayar. Azərbaycan xalqına da daha yaxşı tanıdılarsa, bir çox tələbə olduqca keyfiyyətli və ucuz təhsil ala bilərlər",-O.Erdem deyib.
"Tez-tez Türkiyədən Azərbaycana hər hansı nazir gəlir və müzakirələr aparılır"
"Azərbaycanla Türkiyə arasında hər sahədə çox işlər görülə bilər, görülür də. İki ölkənin liderlərinin bir-birilərinə güvəni sonsuzdur. Torpaqlarını işğaldan azad etmiş Azərbaycan həm iqtisadi, həm sosial, həm də digər sahələrdə inkişaf edir. Türkiyədən qarşılıqlı anlaşmalar üçün hər 10-15 gündən bir nazir bura gəlir. Eləcə də Azərbaycandan da Türkiyəyə nümayəndələr gedir",- o qeyd edib.
Türkiyə-Şimali Kipr Türk Respubllikası Dotluq Qrupunun sədri Şimali Kiprin tanınması və onun Azərbaycandakı təmsilçiliyinin səfirliyə çevrilməsi məsələsinə də toxunub:
"Bunlar ayrıca onsuz da müzakirə olunan məsələlərdir. Azərbaycan parlamenti Şimali Kipr Türk Respublikası ilə dostluq qrupu yaradıb. Tanınma məsələsi liderlər tərəfindən müzakirə edilir. İnşallah Şimali Kiprin buradakı təmsilçiliyi səfirliyə çevriləcək. Bütün platformalarda Azərbaycan Şimali Kiprin yanında olur. Prezident İlham Əliyev də açıqlamaları ilə öz dəstəyini daim göstərir. Bugün və sabah burada olmağımızın səbəbi təhsillə bağlı əməkdaşlıqla əlaqədardır".
