Azərbaycanlı alpinist və müəllim Vəfacan Kahraman dünyanın ən yüksək nöqtəsi hesab edilən Everest zirvəsini fəth edib.
Modern.az-ın məlumatına görə, Vəfacan Kahraman uzun illər ərzində təhsil sahəsində mühüm vəzifələr icra edib.
O, uzun illər "BSB – British School in Baku", "Baku Oxford School" (Şəmkir), "Azerbaijan British College", "Azerbaijan Teacher Development Centre"də müəllim kimi fəaliyyət göstərib.
V. Kahraman magistr təhsilini Azərbaycan Dillər Universitetində İngilis və Amerika ədəbiyyatı üzrə alıb. O, ABŞ Dövlət Departamentinin "International Visitor Leadership Program" (IVLP) məzunu və "Adler International Learning" institutunun peşəkar kouçluq üzrə proqramını uğurla tamamlayan ilk azərbaycanlı qadınlardan biridir.
Vəfacan Kahraman şəxsi bloqunda və sosial media hesablarında Everest zirvəsinə qalxmaqla bağlı hisslərini belə ifadə edib:
“Missiya yerinə yetirildi
Salamatam. Bir az əvvəl Everest baza kampına geri döndüm.
Namıma söylənilən təbriklərə görə təşəkkür edirəm.
Tezliklə evimə çatıb, təndir çörəklə dovğa yemək ümidi ilə ”
Qeyd edək ki, 8848 metr yüksəkliyə malik olan Himalay dağ silsiləsindəki Everest zirvəsi, ekstremal hava şəraiti və oksigen çatışmazlığı ilə tanınır. Buraya qalxmaq adətən 40-60 gün davam edən ağır fiziki və psixoloji hazırlıq tələb edir. Vəfacan Kahraman bu zirvəni fəth edən ilk azərbaycanlı qadındır.
