Azərbaycanda qadın nazir yoxdur, nazir müavinlərinin sayı isə 6-dır.
Modern.az bu barədə Ailə, Qadın və Uşaq Problemləri üzrə Dövlət Komitəsinin hesabatından məlumat əldə edib.
Son 6 ildə respublika ərazisində sadəcə 1 qadın nazir olub. 2018-2021-ci illərdə Naxçıvan Muxtar Respublikasında mədəniyyət naziri vəzifəsini Natəvan Qədimova icra edib. 2022-ci ildən isə heç bir nazirliyə qadın rəhbər təyin edilməyib.
Nazir müavinlərinə gəldikdə isə 2018-ci ildə 6 nəfər, 2019, 2020 və 2022-ci ildə 8 nəfər, 2021-ci ildə 9 nəfər, 2023-2024-cü ildə isə 6 qadın nazir müavini kimi çalışıb.
Dövlət Komitəsi sədri
2018-2024-cü illərdə Ailə, Qadın və Uşaq Problemləri üzrə Dövlət Komitəsinə rəhbərlik qadınlar tərəfindən həyata keçirilib. Bu vəzifəni hazırda Bahar Muradaova icra edir. Naxçıvan Muxtar Respublikasında isə sözügedən komitəyə Ramilə Seyidova sədrlik edir.
Dövlət Komitəsi sədrinin müavini
Son 6 ildə 3 nəfər qadın komitə sədrinin müavini kimi çalışıb.
Yerli icra hakimiyyəti başçısı
2018-2021-ci illərdə icra hakimiyyətlərinə sadəcə 1 nəfər qadın rəhbərlik edib. Bu rəqəm 2022-ci ildə 2-yə qalxsa da, 2023 və 2024-cü illərdə icra hakimi kimi çalışan qadın olmayıb.
Yerli icra hakimiyyəti başçısının müavini
İcra hakimiyyətinin başçısının müavini vəzifəsini icra edən qadınların sayı da son illərdə azalıb. 2018-ci ildə bu göstərici 79 nəfər idisə, hazırda müavin kimi çalışan qadınların sayı 67-ə enib.
Digər illərdə isə göstəricilər isə aşağıdakı kimi olub:
2019: 76 nəfər
2020: 72 nəfər
2021: 72 nəfər
2022: 68 nəfər
2023: 68 nəfər
2024: 67 nəfər
