Kəlbəcər rayonundan olan Ayan Hüseynli ABŞ-nin Nyu York şəhərində yerləşən "The New School" universitetinin Beynəlxalq Əlaqələr üzrə magistr proqramını başa vurub.
2025-ci il buraxılışında universitetin siması seçilən Ayanın çıxışı rezonans doğurub. Azərbaycanlı gənc çıxışında keçmiş məcburi köçkün həyatından, gələcək planlarından danışıb.
"Mən Azərbaycanın Qarabağ bölgəsindən məcburi köçkün düşmüş bir ailədənəm. Ailəm, dünyada milyonlarla insan kimi — və bəzən bəlkə sizlər kimi — evimizi, xatirələrimizi və bir zamanlar yaşadığımız həyatı geridə qoymaq məcburiyyətində qaldı. Biz köçkünlüyün ağırlığını yaşamışıq — qeyri-müəyyənliyi, həsrəti və geri dönə bilmədiyin keçmişlə, qurmalı olduğun gələcək arasında qalıb boğulma hissini.
Amma bütün bunlara baxmayaraq, mən güclü bir həqiqəti öyrəndim: ev sadəcə bir məkan deyil. Ev, səninlə birgə dayanan insanlar, əlindən buraxmaq istəmədiyin xəyallar və səni irəli çağıran, bizi irəli çağıran bir məqsəddir", - o çıxışında bildirib.
Qeyd edək ki, ermənilər onun çıxışına mane olmağa çalışıblar. 20 min nəfər üzvü olan erməni tələbə təşkilatı bununla bağlı dəfələrlə universitet rəhbərliyinə müraciət edib.
Modern.az-a açıqlamasında Ayan Hüseynlinin atası Sənan Hüseynli bildirib ki, ermənilərin bütün təzyiqlərinə baxmayaraq, universitetin rəhbərliyi Ayana çıxış üçün şərait yaradıb:
“Universitetin simasını seçmək üçün uzun prosedurlar olur. Nəhayət, bir nəfər 2025-ci il buraxılışında Universitetin siması seçilir. Seçilən tələbənin məlumatları əvvəlcədən universitetin saytında yerləşdirilir. Ayan da özü barədə məlumatları - azərbaycanlı olduğunu, Qarabağdan olduğunu qeyd etmişdi. Ermənilərin 20 min nəfər üzvü olan tələbə təşkilatı var. Bütün dünyanın hər yerindən olan ermənilər tələbə təşkilatında birləşiblər. Onlar Vətən Müharibəsində də Azərbaycan əleyhinə propoqanda aparırdı. Dünyanın hər yerində universitetin rəhbərliyinə yazırdılar ki, biz bunu araşdırmışıq, Şuşanı, Prezidentlərini paylaşır və sair. Onlar iddia edir ki, bunlar şovinstdirlər, Qarabağ, Şuşa bizimdir, onu çıxış etməyə qoymaq olmaz. Amma buna rəğmən rektor Ayana dedi ki, çıxış et, ermənilər səs-küy salsalar, özüm müdaxilə edəcəm. O da çıxış etdi. Ona qarşı ciddi heç bir addım atıla bilmədi. Məsələ artıq bitdi”.
Milli Məclisin deputatı Sahib Alıyev isə vurğulayıb ki, Ayan kimi savadlı, əzmli bir qız belə bir çıxış etməyə bilməzdi:
“Bu uğuruna görə qızımızı təbrik edir, valideynlərinə göz aydınlığı verirəm. Belə əzmli, savadlı qızımız bu çıxışı etməliydi. Çünki ondakı əzm vətənə bağlılığın əlamətidir. Oradakı ultra millətçi, xain ünsürlərin cəhdlərinə, təzyilərinə baxmayaraq, ona belə bir şərait yaradıldığına görə universitetin rəhbərliyinə də öz təşəkkürümü çatdırıram”.
Deputat ermənilərin hələ də türkofobiyadan qurtula bilmədiklərini deyib: “Bu mərəzdən qurtulmaları üçün yəqin ki, çox vaxt lazım olacaq. Bəlkə də, heç sağalmadılar. Çünki onlar öz varlıqlarını bizə nifrətlə təsdiqləməyə çalışırlar. Oturub fikirləşməlidirlər ki, kimə və nəyə qarşı çıxırıq. Öz vətənində yaşamaq haqqı olan, bununla bağlı fikirlərini bildirən qızamı qarşı çıxırırq. Bu qız burada beynəlxalq hüquqa, insanlığa qarşı qəbahət sayılacaq nə dedi ki, ona qarşı çıxırıq. Qızımız o çıxışı ilə hər baxımdan yüksəkdə durduğunu göstərib. Ona qarşı çıxanlar isə hər baxımdan aşağıda durduğunu ortaya qoydular”.
