Bu gün - 26 İyun Silahlı Qüvvələr Günündə 2016-cı ilin aprel şəhidi kəşfiyyatçı polkovnik Sənan Axundovun ailəsində sevincli anlar yaşanıb.
Modern.az xəbər verir ki, şəhid zabitin oğlu Tahir Axundov leytenant rütbəsilə hərbi məktəbdən məzun olub.
Tahir Axundov Bakıdakı İlyas Əfəndiyev adına Elitar Gimnaziyanın məzunudur. O, 2019-cu ildə Azərbaycan Tibb Universitetinin Hərbi Tibb fakültəsinə müalicə işi ixtisasına (dövlət sifarişi) qəbul olunub. Elə həmin il də təhsilini davam etdirmək üçün Azərbaycan Müdafiə Nazirliyi tərəfindən Sankt Peterburq Ali Hərbi Tibb Akademiyasına göndərilib. Bu gün təhsilini başa vurub leytenat rütbəsilə Vətənə dönən Tahir Axundov hərbi cərrah kimi fəaliyyət göstərəcək.
Şəhid zabitin həyat yoldaşı Nəcibə Axundova bildirib ki, ailə üzvləri Tahirin Vətənə qayıdışı ilə əlaqədar Sənan Axundovun qəbrüstü abidəsini ziyarət edib, oğlunun hərbi tibb xidməti üzrə leytenat rütbəsini almağının sevincini şəhidlə bölüşüblər.
“Çox şükür, Silahlı Qüvvələr Gününü oğlumuz leytenant rütbəsində qeyd etdi. Bir ana üçün, bir Şəhid polkovnikin xanımı üçün bu sadəcə rütbə deyil. Bu həm də uzun və əziyyətli, məsuliyyətli və qüsursuz bir yolun uğurlu və qürurlu sonudur. Biz mərd və cəsarətli bir ailənin – zabit ailəsinin üzvləriyik!”.
Qeyd edək ki, şəhid polkovnik-leytenant Sənan Axundov ailənin yeganə oğul övladı idi. O, Müdafiə Nazirliyində İnformasiya şöbəsinin sektor müdiri vəzifəsində xidmət etmişdi. Ailənin tək oğul övladı olmasına baxmayaraq, tutduğu vəzifədən imtina etmiş və könüllü şəkildə ön cəbhəyə getmişdi.
Sənan Tahir oğlu Axundov 1979-cu il sentyabrın 29-da Füzuli rayonunda anadan olub. 1993-cü ildə Axundovlar ailəsi Füzulidən məcburi köçkün düşüb. Sənan Axundov 1996-cı ildə Bakının Binəqədi rayonundakı 144 nömrəli tam orta məktəbi bitirərək, Ali Hərbi Məktəbə daxil olub. 2001-ci ildə Ali Hərbi Məktəbi bitirib və "N" saylı hərbi hissədə leytenant rütbəsində xidmətə başlayıb.
2007-2009-cu illədrə Almaniya Federativ Respublikasının Hərbi Akademiyasında təhsil alıb.
Daha sonra Bakı Dövlət Universitetinin Hüquq fakültəsində ikinci ali təhsil alıb.
2012-2015-ci illərdə Almaniyada müxtəlif kəşfiyyat təlimlərində iştirak edib. 2012-ci ildə Türkiyədə hərbi təlim keçib.
2016-cı ildə Müdafiə Nazirliyindəki sektor müdiri vəzifəsindən imtina edərək könüllü şəkildə cəbhə bölgəsinə gedib. Onu kəşfiyyat bölüyünün komandiri təyin etmişdilər.
Sənan Axundov 2016-cı il aprelin 18-də "Aprel döyüşləri"ndən sonra Lələtəpə istiqamətində mövqelərimizin hansı vəziyyətdə olduğunu öyrənmək üçün ərazini yoxlamağa gedən zaman minaya düşən silahdaşını - polkovnik-leytenant Vüqar Əbdüləzimovu xilas edərkən özü də minaya düşərək ağır yaralanıb. Onu Füzuli rayonu ərazisində yerləşən hərbi hospitala çatdırsalar da, həkimlər zabitimizin həyatını xilas edə bilməyiblər.
"Aprel döyüşləri"nin son şəhidi - polkovnik-leytenant Sənan Axundov Beyləqanda yerləşən "Cərciz Peyğəmbər" məzarlığında torpağa tapşırlıb. Şəhidin Tahir adlı oğul və Nəzrin adlı qız övladı yadigar qalıb.
Ə.Qafarlı
