Vüqar Bayramov: “Zərərin Dövlət Neft Fondunun vəsaitləri hesabına qarşılanması məqsədə uyğun deyil” Kür və Araz çaylarında baş verən daşqınların fəsadlarının hansı maliyyə mənbələri hesabına aradan qaldırılacağı hələ də açıqlanmayıb. İlkin rəylərə görə, ziyan büdcədən ayırmalarla qarşılanacaq. Belə ki, maliyyə naziri Samir Şərifov bu günlərdə mətbuata iyun ayında büdcəyə əlavə və dəyişiklik ediləcəyini söyləyib. Yəni dəfələrlə büdcəyə dəyişiklik etməyəcəyini söyləyən hökümətin fikrini dəyişməsinə fəlakət səbəb olub. Bu məqsədlə Neft Fondundan 2010-cu ilin büdcəsinə transfertlərin həcminin 400 milyon manat artırılması gözlənilir. Onu da bildirək ki, indiyə qədər dəymiş ziyanla bağlı dəqiq məlumat verilməyib.
İqitsadi və Sosial İnkişaf Mərkəzinin rəhbəri Vüqar Bayramov deyir ki, daşqınlar davam etdiyi və bunun nəticəsində yaranan itkilər tamamlanmadığı üçün indiki halda ziyanı tam olaraq qiymətləndirmək mümkün deyil: “Lakin ilkin hesablamalara əsasən ölkə iqtisadiyyatına dəymiş ziyan kifayət qədər böyükdür..Nəzərə alsaq daşqınlar nəticəsində bəndlər dağılıb, eləcə də ev, fermer təsərrüfatlarına, iqtisadiyyatın diğər subyektlərinə ziyan dəyib, bu ziyanın həcminin yarımmilyard manat olduğu guman edilir Yerigəlmişkən, yarımmilyard manata son olaraq bu sektorlara yönələn investisiyaların daşqınlar nəticəsində məvh olması və digər ziyanlar daxildir”.
Mütəxəssis hesab edir ki, Dövlət Neft Fondundan bu istiqamətə vəsaitlərin ayrılması məqsədə uyğun deyil:”Neft Fondunun vəsaitlərinin sosial və ya infrastruktur olmayan layihələrə xərclənməsi həmin vəsaitlərin xərclənməsindən əldə ediləın gəlirin azalmasına gətirib çıxarır. O baxımdan fonddan 400 milyon manat ayrılması neft vəsaitlərinin qısa müddətdə xərclənməsi tendensiyasını davam etdirə bilər. Eyni zamanda bu neft pullarının səmərəli xərclənməsinə imkan yaratmır. Başqa tərəfdən Neft Fondundan vəsaitin ayrılması arzuolunmaz ənənənin yaranmasına gətirib çıxara bilər”.
2010-cu ilin dövlət büdcəsinə əlavə və dəyişikliklərin planlaşdırıldığını söyləyən ekspert hesab edir ki, daşqının aradan qaldırılması istiqamətində büdcədən vəsaitin ayrılması daha məqsədəuyğundur: “Birinci rübün yekunlarına əsasən büdcənin ngəlirlər hissəsində profsit var.Bu büdcəyə dəyişiklikləri məqbul edir. Əlavə və dəyişikliklərdən sonra bu istiqamətə vəsait ayrılması daha arzuolunanadır”.
V.Bayramov deyir ki, daşqınlar nəticəsində ziyan görmüş təsərrüfatların qurulması deyil, torpağın təmizlənməsi, yararlı vəziyyətə gətirilməsi üçün vəsaitin ayrılması vacibdir.
Modern.az
