Naxçıvan istiqamətində yolu azaraq Ermənistana keçən Azərbaycan əsgərinin əsir götürülməsi, amansız işgəncələrə, qeyri-insani rəftara məruz qalması ermənilərin barbar və vəhşi millət olduğunu bir daha göstərdi.
Silahsız əsgərin xüsusi amansızlıqla döyülməsi, təhqir olunması və həmin görüntülərin aşkar şəkildə sosial şəbəkələrdə paylaşılması bütün qanunların ayaqlar altına alınması deməkdir. Dünyanın dörd bir yanında əsgər Hüseyn Axundovla bağlı etiraz səsləri ucaldılsa da, Ermənistanın beynəlxalq hüquq qarşısında məsuliyyətə cəlb olunması məsələsi sual altındadır.
Bəs Azərbaycan erməni vəhşiliyinə cavab olaraq hansı addımları atacaq?
Məsələ ilə bağlı Modern.az-a danışan deputat Aydın Mirzəzadə bildirib ki, Azərbaycanın müvafiq orqanları əsir düşən hərbçimizin qaytarılması üçün aktiv işə başlayıb:
"Azərbaycan Xarici İşlər Nazirliyi (XİN) Ermənistanın vəhşiliyini əks etdirən bəyanat yayıb. Həmçinin əsgərimizin geri qaytarılması üçün beynəlxalq qurumlara müraciət edilib. Şübhə yoxdur ki, indi bizim danışdığımız vaxtda belə müvafiq orqanlar əsgərimizin geri qaytarılması üçün ciddi addımlar atır. Tariximiz də sübut edir ki, Azərbaycan öz əsgər və vətəndaşına hər zaman sahib çıxıb və bundan sonra da sahib çıxacaq",-deyə parlamentari söyləyib.
A.Mirzəzadə qeyd edib ki, ermənilərin əsir düşən əsgərimizə qarşı işgəncə verməsi mədəniyyətsizliyin göstəricisidir: "Azərbaycan hərbçisinin yaralı erməni əsgərinin yarasını sarıdığı videosu indiyə qədər sosial şəbəkədə izlənilir. Dövlətimiz yeri gəldikdə özünün təcili tibbi yardım maşını ilə xəstə erməni sakinlərini Xankəndidə yerləşən xəstəxanaya aparır. Onların hüquqlarının təmin olunması ilə bağlı bəyanat verir və görüşmək üçün yenidən müraciət edir. Yəni prinsip etibarilə Azərbaycan öz humanistliyini və insanlara dəyər verdiyini göstərir. Ancaq ermənilərin əsgərimizə qarşı davranışının əks olunduğu video Ermənistan cəmiyyətində Xocalı soyqırımını törətmək əhval-ruhiyyəsinin qaldığını göstərir. 18 yaşında günahsız əsgərə yalnız vəhşi təbiətli, qonşuya, hərbi əsirə rəhm duyğusu olmayan insanlar bu cür işgəncələr verə bilər. Əlbəttə ki, bu bizi hiddətləndirir və bunu edənlər öz cəzalarını alacaq".
Deputat Elman Məmmədov isə söyləyib ki, beynəlxalq qurumlar ermənilərin vəhşiliyinə biganə qalmamalıdır.
"Həmin görüntülərə təkcə biz yox, bütün beynəlxalq qurumlar və Ermənistanın havadarları da baxıb. Boğazdan yuxarı insan hüquqlarından danışan beynəlxalq qurumlar var. Onlar kor deyillər ki, bunu da görsünlər. Ermənistan tərəfindən edilən vəhşiliyi görüb, dərs çıxarsınlar və buna qarşı tədbir görsünlər. Azərbaycan bu məsələ ilə bağlı müvafiq qurumları məlumatlandırıb, tələblərini irəli sürüb. Həmçinin, Baş Prokurorluq tərəfindən cinayət işi açılıb. Ölkəmiz siyasi-hüquqi müstəvidə lazımlı tədbirləri görür. Əsgərimizə qarşı törədilən vəhşilik cavabsız qalmayacaq və artıqlaması ilə cavablarını alacaqlar. Bizim ekoaktivistlərimiz Laçın-Xankəndi yolunda dinc aksiyaya başladığından bəri hər gün Beynəlxalq Qırmızı Xaç Komitəsinin (BQXK) maşınları Xankəndi və Ermənistan istiqamətində hərəkət edir. BQXK birbaşa ermənilərə qulluq etməklə məşğuldur. Elə onların özləri də ermənidir",- deputat vurğulayıb.
E.Məmmədov deyib ki, BQXK ermənilər üçün dəridən-qabıqdan çıxır, ancaq bizə münasibətləri belə deyil:
"1991-ci ilin noyabrın 1-dən 1992-ci ilin fevralın 25-nə qədər biz Xocalıda tam mühasirədə yaşamışıq. O zamanlar komitənin fəaliyyətini görmədik. Bu, ədalətsizlik və ikili standartlardan başqa bir şey deyil. Ancaq ermənilərdən ötrü dəridən-qabıqdan çıxırlar. Xocalı soyqrımından sonra bizim nə qədər vətəndaşlarımız əsir düşdü. 4000 Azərbaycan vətəndaşının taleyi haqqında hələ də xəbər yoxdur. Bu komitə indiyə qədər bir iş görübmü? Mən hesab edirəm ki, bizim ekoaktivistlərimiz onların avtomobillərinin keçidinə icazə verməməlidir. Tələbimiz belə olmalıdır ki, əsgərlərimizi geri gətirin. Beynəlxalq Qırmızı Xaç Komitəsi ermənilərə görə yaman canfəşanlıq göstərir. İndi də bizim əsgərlərimiz əsirlikdədir. Gedin, onların vəziyyəti və taleyi ilə maraqlanın. Birinci Qarabağ müharibəsi zamanı və hazırda vəhşilik törədənlərin cəzalandırılması üçün tədbirlər görün. Ermənilərin vəhşiliyi cavabsız qalmayacaq. Azərbaycan dövləti öz üzərinə düşəni yüksək səviyyədə görür".
"Biz əsir düşmüş ermənilərə xoş davranmaqla öz insanlığımızı göstəririk, bütün bəşəri qanunlara, beynəlxalq hüquqa hörmətlə yanaşdığımızı nümayiş etdiririk. Ancaq bunun müqabilində bizə qarşı şər-böhtan kampaniyaları həmin o beynəlxalq qurumlar tərəfindən aparılır. Ermənilər də öz vəhşliklərini göstərirlər. Xocalıda etdikləri cinayətlər göz qabağındadır. Beynəlxalq təşkilatlar ermənilərin etdiklərinə qarşı 30 ildə heç bir tədbir görməyib. Avropa İttifaqı və başqa təşkilatlar Azərbaycan əsgərinin davranışını və ermənilərin hərəkətlərini müqayisə etsinlər. Əsgərlərimiz yaralı erməni hərbçisinin yaralarını sardıqdan sonra, o, Ermənistana geri qayıtdıqda igidlərimizin onu xilas etdiyini söyləmişdi. Hətta, həmin eməninin ailəsi Azərbaycana minnətdarlığını bildirmişdi. O dönəmdə Fransa kimi dövlətlər ölkəmizin üzərinə böhtanlar yağdırırdı. İndi ki gözünüz kor deyil, baxın, Azərbaycan əsgərinə necə işgəncə verirlər", - deyə Xocalının deputatı əlavə edib.
Xatırladaq ki, Azərbaycan Müdafiə Nazirliyinin məlumatına görə, Naxçıvanda xidmətdə olan 2004-cü il təvəllüdlü Bəbirov Aqşin Qabil oğlu və 2003-cü il təvəllüdlü Axundov Hüseyn Əhliman oğlu itkin düşüblər. Onların yolu azaraq Ermənistan ərazisinə keçdiyi məlum olub. Hər iki əsgərimiz Ermənistanda saxlanılıb. Ötən gün sosial şəbəkələrdə Hüseynin ermənilər tərəfindən işgəncələrə məruz qalmasını əks etdirən görüntülər paylaşılıb.
