Səudiyyə Ərəbistanı hökuməti ilə Azərbaycan Respublikası hökuməti arasında imzalanan saziş həmçinin hökumətimizin viza siyasətində şəffaflığı, eləcə də, ölkəmizin beynəlxalq birliyin üzvü olan dost dövlətlərlə münasibətlərin inkişafına verdiyi dəyəri göstərir.

Modern.az xəbər verir ki, bunu Milli Məclisin bu gün keçirilən iclası zamanı deputat Rizvan Nəbiyev deyib.

"Azərbaycan Respublikası Səudiyyə Ərəbistanı Krallığı ilə həm ikitərəfli səviyyədə, həm də çoxtərəfli müstəvidə sıx əməkdaşlıq edir. Dost və qardaş Səudiyyə Ərəbistanı ilə münasibətlərimizin əsaslarının formalaşdırılmasına Ümummilli Lider Heydər Əliyevin 30 il əvvəl, 1994-cü ildə bu ölkəyə etdiyi rəsmi səfər ciddi töhfə vermişdir. Ümummili Liderin İki Müqəddəs Ocağın Xadimi, mərhum Kral Fəhd Al Səudla apardığı danışıqlarla və iki ölkə arasında müxtəlif sahələrdə əməkdaşlığın ümumi istiqamətlərinə dair imzalanan hökumətlərarası Baş Sazişlə münasibətlərimzin möhkəm təməli qoyuldu. Məhz bu fundament üzərində qurulan və son 30 il ərzində iki dövlət arasında inkişaf edən əlaqələr Azərbaycan Xarici İşlər Nazirliyi tərəfindən “strateji tərəfdaşlıq səviyyəsinə yüksəlmiş” münasibətlər kimi dəyərləndirilir. Hesab edirəm ki, bu strateji tərəfdaşlığın ikitərəfli yazılı sənəddə də hüquqi baxımından təsbit olunması zərurətdir.

Səudiyyə hökumətinin torpaqlarımızın beynəlxalq hüquqa zidd işğalına uzun illər beynəlxalq müstəvidə göstərdiyi dəstək mövqeyi olmuşdur. Bir faktı vurğulamaq istərdim ki, Azərbaycan Respublikası 2023-ci ilin sentyabrında suverenliyini tam bərpa edənədək Səudiyyə Ərəbistanı Ermənistanla diplomatik münasibətlər qurmamışdrı.Bu illər ərzində həm ikitərəfli, həm də çoxtərəfli çərçivədə, o cümlədən BMT və onun ixtisaslaşmış qurumları, İslam Əməkdaşlıq Təşkilatı, Qoşulmama Hərəkatı və digər beynəlxalq platformalarda göstərilən qarşılıqlı dəstək yüksək qiymətləndirilməlidir",-o deyib.

Deputat söyləyib ki, əlaqələrin müsbət dinamika ilə inkişafı və ölkələrimiz arasında yüksək səviyyədə siyasi dialoq Prezident İlham Əliyev tərəfindən uğurla davam etdirilir:

"Son 2-3 il ərzində iki ölkə arasında müşahidə olunan qarşılıqlı səfərlər dinamikası buna əyani sübutdur.

2022-2023-cü illər ərzində Səudiyyə Ərəbistanı və Azərbaycan arasında müxtəlif səviyyələrdə qarşılıqlı olaraq 16 səfər həyata keçirilib.

Ölkələrimiz arasında əməkdaşlığın inkişafında parlamentlərarası əlaqələr də vacib yer tutur. Xanım Sədr sizin ötən illər ölkəmizdə səfərdə olan çoxsaylı Səudiyyəli nümayəndə heyətlərinin rəhbərləri ilə Milli Məclisdəki görüşləriniz buna misaldır.

Post münaqişə dövründə də Səudiyyə Ərəbistanının dost münasibəti özünü faktlarda göstərir. Azərbaycanın işğaldan azad edilmiş ərazilərində minatəmizləmə fəaliyyəti üçün ayrılan 3 milyon ABŞ dolları məbləğində dəstək minnətdarlıqla qeyd edilməlidir.

Səudiyyə Ərəbistanı investisiya naziri Azərbaycanın işğaldan azad olunmuş ərazilərinə səfər edən ilk əcnəbi hökumət üzvlərindən olub. Səudiyyəli nazir energetika, xüsusilə “yaşıl energetika”, kənd təsərrüfatı, eko-turizm kimi sahələrə sərmayə yatırmaqda maraqlı olduqlarını qeyd edib. ölkə arasında İqtisadi Əməkdaşlıq Komissiyaları bu istiqamətdə fəaliyyətlərini uğurla davam etdirirlər.

Sonda fikirlərimi bu ölkədə yerləşən iki müqəddəs şəhərin İslam dini üçün malik olduğu dəyərlərə Ümummilli Liderimizin və cənab Prezidentin göstərdiyi ehtiramı vurğulamaqla yekunlaşdırmaq istərdim. Belə ki, həm Ümummilli Lider və həm də cənab Prezident Səudiyyə Ərəbistanına etdikləri səfərlər çərçivəsində Məkkə və Mədinə şəhərlərində olub, Ümrə ayinini yerinə yetirib, Məhəmməd (s) Peyğəmbərin qəbrini ziyarət ediblər. Allah qəbul etsin".