"Düşünürəm ki, elə adam yoxdur ki, Rusiya ilə Ukrayna arasında baş verənlərə görə təəssüflənməsin".

Bunu Modern.az-a açıqlamasında Azərbaycanda Rus İcmasının sədri, Milli Məclisin deputatı Mixail Zabelin bildirib.

O, deyib ki, türkiyəlilərlə azərbaycanlılar kimi, ukraynalılarla ruslar da bir millətdir: 

“Rusiya və Ukraynanın ortaq tarixi, ortaq dili var. Bu iki xalq bir-birindən fərqlənmir. Mən də həmçinin Ukrayna ilə Rusiya arasında baş verənlərə görə çox təəssüflənirəm. Amma həmişə deyirəm ki, Azərbaycandan, Prezidentimiz İlham Əliyevdən, Birinci vitse-prezident Mehriban xanım Əliyevanın düzgün siyasətlərindən nümunə götürmək olardı. Məhz onların yürütdüyü xarici və daxili siyasət Azərbaycanın başqa dövlətlərlə münasibətləri baxımından mühüm rol oynayır. Prezidentimiz hər şeydən əvvəl cəmiyyətimizin stabilliyini, millətimizin rifahını düşünür. Sözsüz ki, bunun sayəsində biz dövlətimizin iqtisadi, mədəni və sosial inkişafını görürük. Xalqın rifahının, rahatlığının təmin edilməsi hər bir dövlət orqanı işçisinin prioritetidir. Çoxlu fərqlərimiz olmasına baxmayaraq, hətta bəzən Rusiya və Azərbaycan hökumətləri arasında kəskin münasibətlər də yaransa, Azərbyacanda rus dili qadağan edilməyib. Azərbaycanda rus dilinin öyrənilməsi üçün böyük  və müsbət şərait, rusdilli məktəblər var. Buna görə də Azərbaycan ortaq tarixi keçmişimizi və bu günümüzü unudan ölkələrə nümunə ola bilər”.
 

Deputat vurğulayıb ki, müharibə hər iki ölkənin - Rusiya və Ukraynanın sosial-iqtisadi inkişafına böyük zərbə vurur:

“Rusiya və Ukraynada xeyli insan bu müharibəyə görə həyatını itirdi. Ölənlər arasında yeni ailə həyatı quracaq mükəmməl gənclər də var. Buna görə də tez bir vaxtda müharibə dayandırılmalı və həm Rusiya, həm də Ukraynada sülh yaranmalıdır. Sülh danışıqlarına dair bir sıra çağırışların olmasına baxmayaraq, Ukrayna prezidenti dünyaya açıqca elan etdi ki, sülh masasına oturmayacaq. Düşünürəm ki, çoxlu səhvlərə yol verilib. Elə bir an gəlib ki, danışıqlar masasına əyləşildikdə Rusiyanın hansı tələblər irəli sürəcəyini demək çətindir. Ukrayna Rusiyanın təklifləri ilə razılaşmaq istəmir.  Amma əvvəl-axır hər iki ölkə  sülh masasına əyləşəcək və ölümcül müharibəyə son qoyulacaq. Biz sadəcə, bunun daha tez baş tutmasını arzulaya bilərik”.