Rusiya Federasiyasının Prezidenti Vladimir Putin dekabrın 28-də Azərbaycan Respublikasının Prezidenti İlham Əliyevə zəng edib. Telefon danışığı əsnasında Vladimir Putin dekabrın 25-də Bakı-Qroznı marşrutu üzrə uçan “Azərbaycan Hava Yolları”na məxsus sərnişin təyyarəsinin Rusiyanın hava məkanında fiziki-texniki xarakterli kənar müdaxiləyə məruz qalması və nəticədə baş vermiş faciəvi hadisə ilə bağlı üzrxahlığını ifadə edib, bu qəzada həlak olanların ailələrinə və yaxınlarına başsağlığını çatdırıb, xəsarət alanların tezliklə şəfa tapmasını dilədiyini deyib.

Milli Məclisin deputatı Elşad Musayev Modern.az-a deyib ki, Azərbaycan cəmiyyətinin gözlədiyi o idi ki, bu işdə günahkar tərəf olan Rusiya üzr istəsin:

“Nəzərə alaq ki, adətən belə hallarda müəyyən qədər vaxtı uzatmağa, zaman qazanmağa, günahı üzərindən atmağa çalışırlar. MDB məkanında və dünyanın ayrı-ayrı ölkələrində belə rəy formalaşdırmağa çalışırdılar ki, Rusiya üzr istəməyəcək. Amma mən hesab edirəm ki, Azərbaycanın tələbindən, ölkənin siyasi rəhbərliyinin sərt mövqeyindən sonra, Rusiya tərəfi hər şeyi etiraf etmək məcburiyyətində qaldı”.

Deputat qeyd edib ki, rəsmi Moskvanın günahkarları cəzxalandıracağını da gözləyir:

“Dünya təcrübəsinə görə, cinayəti törədən şəxslər qanunvericiliyə uyğun şəkildə cəzalandırılır. Eyni zamanda günahkar dövlət də təzminat ödəyir. Yəqin ki, bu halda da elə olacaq. Bizim heç kəslə münasibətlərimizin pozulmasında marağımız yoxdur. O cümlədən qonşu dövlət olan Rusiya ilə əlaqələrin pozulmasında maraqlı deyilik. Ancaq bizə qarşı hər hansı hadisə törədilibsə, günahkarı üzə çıxarmaq və haqqımızı tələb etmək hüququmuz var və bunu yerinə yetiririk. Hesab edirəm ki, işlər bundan sonra yavaş-yavaş qaydasına düşəcək”.