Milli Məclisin Asiya Parlament Assambleyasındakı (APA) nümayəndə heyətinin rəhbəri Rizvan Nəbiyev 2025-ci il 11-13 yanvar tarixlərində İraqın paytaxtı Bağdad şəhərində keçirilən təşkilatın Siyasi məsələlər üzrə daimi komitəsinin iclasında iştirak edib.
Modern.az-ın məlumatına görə, açılış mərasimində çıxış edən Rizvan Nəbiyev Azərbaycan torpaqlarının Ermənistan tərəfindən işğalına son qoyulduqdan sonra regionda yeni siyasi vəziyyətin yarandığını, de fakto sülh və sabitliyin bərqərar olduğunu vurğulayıb. Azərbaycan Respublikası Prezidenti İlham Əliyevin təşəbbüsü ilə Ermənistana təklif edilmiş sülh müqaviləsinin iki maddəsi istisna olmaqla ümumən razılaşdırıldığı, şərti dövlət sərhədinin delimitasiyası və demarkasiyası üzrə yaradılmış dövlət komissiyasının fəaliyyət göstərdiyi qeyd edilib.
Rizvan Nəbiyev çıxışında 1980-ci illərin sonlarında Ermənistan tərəfindən zorla qovulmuş Qərbi Azərbaycanlıların öz doğma torpaqlarına geri dönüş hüququ barədə danışıb və məsələnin sülh prosesindəki əhəmiyyətini həm humanitar, həm də siyasi aspektdən vurğulayıb. Deputat, bu qayıdışın yalnız humanitar hüquqların bərpası deyil, həm də regionda sülhün və qarşılıqlı etimadın möhkəmlənməsi üçün vacib bir addım olduğunu qeyd edib.
Rizvan Nəbiyev çıxışında həmçinin hazırda Asiya regionunun üzləşdiyi çağırışlar və APA-nın bu çağırışların həllindəki roluna dair fikirlərini də bildirib. O, APA-nın Asiya regionunun daha sabit, firavan inkişafına töhfə üçün mühüm və böyük potensiala malik platforma olduğunu söyləyib. O, Azərbaycanın D8 təşkilatına üzv qəbul edilməsini dövlətimizin Asiya dövlələri və İslam Əməkdaşlıq üzvü dövlətlərlə əməkdaşlığa verdiyi dəyər kimi səciyyələndirib.
Komitə iclasının açılış mərasimində həmçinin İraqın Nümayəndələr Şurasının Xarici əlaqələr komitəsinin sədr müavini, Asiya Parlament Assambleyasının Siyasi məsələlər üzrə daimi komitəsinin sədri Cabbar Əl-Kənani, APA-nın baş katibi Mohammad Reza Majidi çıxış ediblər.
İclasda yaxşı idarəçilik və qanunun aliliyi, dostluq və əməkdaşlıq vasitəsilə Asiyada tərəqqinin təmin edilməsi, demokratiya yolu ilə harmonik inkişaf və digər məsələlərdə parlamentin roluna həsr olunmuş 8 qətnamə layihələri müzakirə olunaraq qəbul edilib.
Daimi Komitənin iclası ilə yanaşı, APA Büro iclası və APA İşçı Qrupunun da iclasları keçirilmiş, təşkilatın Nizamnaməsinə dəyişiklik, 2025-ci il APA-nın fəaliyyət təqvimi barədə qərarlar verililib.
Səfər çərçivəsində Milli Məclisin deputatı Rizvan Nəbiyev və iştirakçı ölkələrin nümayəndə heyətlərinin rəhbərləri İraqın Nümayəndələr Şurasının sədri Mahmud Əl-Məşhədani tərəfindən qəbul edilib.
Azərbaycan Respublikasının İraq Respublikasındakı müvəqqəti işləri vəkili Elnur Məmmədzadə tədbirlərdə iştirak edib.
Qeyd edək ki, bu yaxınlarda APA-ya üzv ölkələrin parlament sədrlərinin ölkəmizə gəlməsi və 4-5 günlük tədbirin keçirilməsi barədə məsələ razılaşdırılıb.
