Qazaxıstan Nəqliyyat Nazirliyi tərəfindən Aktau yaxınlığında Azərbaycana məxsus təyyarənin qəzaya uğraması barədə hesabat yayımlanıb. Hesabatda təyyarənin qəzadan əvvəl kənar müdaxiləyə məruz qaldığı təsdiqlənib. Azərbaycan hökumətindəki rəsmi mənbə "Reuters" agentliyinə bir sıra yeni faktlar açıqlayıb.

Açıqlamada bildirilib ki, Azərbaycan təyyarəsi Rusiyanın "Pantsir-S" raketi ilə vurulub. “Azərbaycan tərəfində təyyarədən çıxarılan və beynəlxalq ekspertiza nəticəsində müəyyən edilmiş “Pantsir-S” raketinin qəlpəsi var”, - mənbə bildirib.

Ancaq Rusiya faktı etiraf etmək və üzr istəmək niyyətində deyil.  Moskva öz günahını açıq şəkildə etiraf edib məsuliyyəti üzərinə götürməlidir. Əks halda hazırda sübut bazası formalaşır, faktlar, dəlillər toplanır və beynəlxalq məhkəməyə müraciət etmək istiqamətində hazırlıq işlər aparılır.

Artıq bir çox qurum məsələ üzərində iş aparır. Bəs Milli Məclisdə məsələ ilə bağlı hansı işlər görülüb?

Modern.az-a danışan Milli Məclisin Müdafiə, təhlükəsizlik və korrupsiya ilə mübarizə komitəsinin üzvü Aydın Mirzəzadə bildirib ki, parlamentin hər bir üzvü həmin hadisədən sonra məsələyə münasibət bildirib:

“Hər kəs Azərbaycan dövlətinin suverenliyinə toxunulduğunu, dinc vətəndaşlarımızın həyatlarını heç nədən itirdiyini bir daha  vurğuladı və  beynəlxalq hüquqa uyğun qaydada məsələlərin həll olunmasnının vacibliyini vurğuladılar.  Verilən açıqlamalar ilkin, daha çox texnikin açıqlamalardır. Biz məslələrin axıra qədər araşdırılmasının tərəfdarıyıq. Amma ortada fakt var ki Azərbaycan təyyarəsi Rusiya səmasında olarkən vurulub.  Yüksəklikdə olan təyyarə hansısa vətəndaşın ov tüfəngi ilə  vurula bilməz. Rusiya sonradan özü də etiraf etdi ki, "Xalça" sistemi təqdim edilib, ancaq Azərbaycan tərəfinə gec xəbər verilib. Həmin sistemi tətbiq edilərkən əraziyə yaxınlaşan təyyarələr əvvəlcədən xəbərdarlıq edilir və başqa istiqamətə yönəldilir. Rusiya tərəfindən  bu addım atılmadı. Mətbuatdan oxuduğuma görə, Rusiya tərəfində bunun cinayət işi kimi araşdırması gedir”.

Deputat söyləyib ki, Milli Məclis gələcəkdə hansısa situasiyada parlament kimi mövqe bildirə bilər:

“Milli Məclisin xüsusi bəyanatı yoxdur. Əlbəttə ki, gələcəkdə hər hansı bir situasiyada parlament kimi mövqe bildirə bilər. Ortada ölkəmizin, dövlətimizin, Prezidentimizin, cəmiyyətimizin qəti mövqeyi var.  Deputatlarımızın hər biri bu məsələdə öz mövqeyini bildirdi. Böyük əksəriyyəti həlak olanların yas mərasimlərində iştirak etdilər. Mən isə imkan oldu, Milli Qəhrəman stüardessa Hökumə Əliyevanın Samux rayonunda ailəsinə baş çəkdim, onların ağır dərdini bölüşdürdüyümü bildirdim”.

Milli Məclisin digər bir deputatı Azər Badamov isə vurğulayıb ki, təyyarəmizin qəzaya uğramasının bütün məsuliyyəti Rusiyanın müvafiq dövlət orqanları üzərinə düşür:

“ AZAL təyyarəsi Qroznıda Rusiyanın Hərbi Hava Müdafiə qüvvələrinin məsuliyyətsizliyi və mülki aviasiya ilə koordinasiyalı fəaliyyət göstərməməsi nəticəsində vurulub və qəzaya uğranıb. Qazaxıstanın ilikin hesabatı şəffaf hazırlanıb və qəzanın baş verməsi səbəbləri aydın şəkildə qeyd olunmuşdur. Belə ki, hava hücumundan müdafiə qüvvələri kovyor əməliyyatı haqqında mülki aviasiyaya təyyarəmizi vurandan sonra məlumat vermişdir. Yəni bütün detallar araşdırılır və yekun hesabat elan olunacaqdır.  Bu baxımdan təyyarəmizin qəzaya uğramasının bütün məsuliyyəti Rusiyanın müvafiq dövlət orqanları üzərinə düşür”.

Deputat deyib ki, qəza ilə bağlı yekun hesabat açıqlanmadığından nəticəni gözləməliyik:

“O cümlədən Rusiyanın dövlət rəhbərliyi də müvafiq komisiyanın yekun hesabatını gözləyir və sonra lazımı addımların atacağını hesab edirəm. Yəni hər şeyi zaman göstərər. Hesab edirəm ki, Rusiya təyyarə qəzası ilə bağlı bütün məsuliyyətini öz üzərinə götürər və beynəlxalq normaları çərçivəsində müvafiq addımları atacaqdır. Çünki, təyyarə qəzası iki qonşu və müttəfiq ölkə arasında yükəsk səviyyədə inkişaf edən münasibətlərə kölgə salmamalıdır. Münasibətlər qarşılıqlı hörmət və səmimiyyət üzərində qurlulmalı və davam etməlidir. Həm də komisiyanın  yekun qərarı açqlanmamış bəyanatların verilməsini düzgün hesab etmirəm".