"Konstitusiya və Suverenlik İli” ilə əlaqədar Bakıda metro stansiyalarına yeni adların verilməsi məsələsi gündəmə gələndən sonra mövzuya diqqət artıb.

Milli Məclisin deputatları da ayrı-ayrılıqda məsələyə münasibət bildiriblər.

Metro mövzusunun aktuallığını nəzərə alan Modern.az-ın əməkdaşı parlamentarlardan sonuncu dəfə nə zaman yeraltı nəqliyyat vasitəsidnən istifadə etdiklərini soruşub.

Aydın Mirzəzadə tez-tez olmasa da, ara-sıra metrodan istifadə etdiyini bildirib:

"Tez-tez yox, amma ara-sıra metrodan istifadə edirəm.İlk növbədə ona görə ki, insanların arasında olmaq, onları eşitmək və qayğılarını dinləmək istəyirəm. Bundan güc alıram. Metro ilə bağlı xəbərləri çox diqqətlə izləyirəm. Bu gün metroda sıxlıq, çox təəssüf ki, ara-sıra insanların qatar yoluna düşməsi halları var. Bir dəfə Bakı metropoliteninin rəhbərliyinə təklif yolladım. Təklifim beləydi ki, stansiyalarda dayanacaq platforması ilə dəmir yolu arasına şüşədən divar çəkilsin. Şüşə divarın qapıları vaqonların qapısı ilə eyni vaxta açılsın və insanlar minə bilsin. Bu gün oxuyuram ki, belə bir təklif metro rəhbərliyi tərəfindən nəzərdən keçirilir. Demirəm mənim təklifim əsasında bunu müzakirə edirlər, amma görünür ki, dünya təcrübəsinə baxaraq buna gedilir".

A.Mirzəzadə hazırda mövcud olan stansiya adlarının özünü doğrultduğunu düşünür:

"Hesab edirəm ki, indiki adlar özünü doğruldur. Məsələn "İçərişəhər", "Sahil", "Gənclik", "Nəriman Nərimanov", "Koroğlu" stansiyalarını götürək. Bunların hər birində bizim tariximizin, kimliyimizin bir hissəsi var. Hesab edirəm ki, hamısının yox, bəziləriinin adını dəyişmək olar. Mənə elə gəlir ki, burada söhbət adların dəyişdirilməsindən yox, yeni yaradılacaq stansiyalara adların qoyulmasından gedir".

Məlahət İbrahimqızı sonuncu dəfə "Xətai" metrostansiyasından istifadə etdiyini deyib:

“Sonuncu dəfə bu yaxınlarda “Xətai” stansiyasından istifadə etmişəm. İçərişəhərə gedirdim. Düzdür, bu zaman metronun pik vaxtı deyildi. Metro həqiqətən də sovet vaxtında ən çox sevdiyimiz, güvənilən ictimai nəqliyyat vasitəsi olub. Düzdür, indi metroda da hadisələr olur. Amma təyyarədə də, minik avtomobilində də qəza olmurmu? Amma gediş-gəliş baxımdan ən yaxşı nəqliyyat vasitəsi metrodur".

M.İbrahimqızı "Ulduz" stansiyasının adının dəyişdirilməsinin tərəfdarıdır:

"Mən ən çox “Xalqlar dostluğu”, “Qara Qarayev”, “Neftçilər” metrostansiyalarından istifadə edirdim. Bu adların dəyişilməsinə ehtiyac görmürəm. Biz tolerant, digər xalqlara sevgi və dostluqla yanaşan xalqıq. Digər tərəfdən,  “Neftçilər” stansiyasını götürək. Azərbaycan dünyada nefti ilə məşhurdur. Neftçilərimizin fədakar əməyi ilə bu şöhrətə gəlib çatmışıq. Amma “Ulduz” stansiyasının adı ilə bağlı addım atmaq olar. Burada ulduzun nə mahiyyət daşıdığını açığı, bilmirəm".

Arzuxan Əlizadə metrodan sonuncu dəfə Yeni il bayramı ərəfəsində istifadə edib:

“Əvvəllər çox istifadə etmişik. Son dönəmlərdə isə yox. Təxminən Yeni il bayramı ərəfəsində bazar günü istifadə etmişəm. Mütəmadi olaraq metrodan istifadə etmirəm".

A.Əlizadə də hazırda mövcud olan stansiyaların adlarının dəyişdirilməsinə elə ciddi ehtiyac olmadığını düşünür:

"Yeni metrostansiyalara bizim tariximizi özündə əks etdirən bəzi şəxslərin, eləcə də  torpaqlarımızın işğaldan azad edilməsi istiqamətində qəhrəmanlıq nümayiş etdirənlərin adlarının  verilməsi məqsədəmüvafiq olardı. Hər halda bu, ciddi məsələdir. Hesab edirəm ki, yeni metostansiyalara adların verilməsi ilə bağlı ictimai müzakirə də keçirilsə, yaxşı olar. Biz suverenliyimizi, ərazi bütövlüyümüzü  bərpa etmişik. Bu il də “Suverenlik və Konstitusiya İli”dir. Uyğunlaşdırma ilə, ictimaiyyətin fikrini almaqla adların verilməsi mümkündür. Keçmişimizi, eləcə də Qərbi Azərbaycanla əlaqəli tariximizi əks etdirən adların verilməsi daha məqsədəmüvafiq olardı".
 

Elşad Musayev bəzi tədbirlər üçün İçərişəhərə gedən zaman metrodan istifadə edir.

"Mən uzun illərdir ki, avtomobil idarə edirəm. Amma indiki dövrdə vəziyyət elədir ki, hər hansı tədbirlə əlaqədar İçərişəhərə gedəndə maşını saxlayıb metroya minirəm. Ötən həftə metro ilə getmişəm. Bu yaxınlarda “MediaTürk” TV-yə müsahibə verməyə gedəndə də metroya minmişdim. Burada qeyri-adi heç nə yoxdur”,-o deyib.

Nəsib Məhəməliyev isə sonuncu dəfə metrodan “28 May” stansiyasının ikinci xətti açılanda istifadə edib:

"Səmimi deyirəm. Onda heç deputat deyildim. Nəsimi rayon İcra Hakimiyyətinin başçısıydım". 

"Ulduz" stansiyasının adının dəyişdirilməsini istəyəblər arasında Nəsib Məhəməliyev də var.

"Mən “Ulduz” stansiyasının adının dəyişilməsini istərdim. Çünki o sovetdənqalma addır. “İnşaatçılar satansiyasının da adı dəyişdirlə bilər. Azərbaycan tarixində xüsusi iz buraxmış ictimai xadimlərimizin, dünya miqyasında tanınmış şəxsiyyətlərimizin adları verilə bilər. “Xalqlar dostluğu” stansiyasının adı qala da, dəyişdirilə də bilər. “Xalqlar dostluğu” da sovet dövründən qalmadır. Amma xalqlar dostluğu hər bir cəmiyyət və dövlət üçün aktuallıq kəsb edən məfhumdur. Azərbaycan etnik baxımından kifayət qədər rəngarəng dövlətdir.  Azərbaycan cəmiyyətində müxtəlif etnik qruplar təmsil olunur və bu istiqamətdə dövlət kifayət qədər məqsədyönlü siyasət aparır. 44 günlük Vətən müharibədə biz bunun nəticəsini gördük", - N.Məhəməliyev deyib.

"Amma bu elə bir məsələdir ki, xüsusi komissiya yaradılmalıdır. İctimai xadimlərin, ziyalıların, sosioloqların, mədəniyyət və incəsənət adamlarının iştirakı olmalıdır.  Komissiyada ətraflı şəkildə müzakirə aparılmalıdır. Tariximizlə, Azərbaycanın gələcəyi, milli mentalitetimizlə və dövlət ideologiyamızla bağlı adlar verilməlidir. Bu fərdi qaydada hansısa bir deputatın, siyasətçinin, məmurun təklifi ilə olmalı deyil. Kifayət qədər fundamental təhlillər tələb edən məsələdir", - deputat əlavə edib.
 

Vüqar İskəndərov vurğulayıb ki, bəzən metrodan böyük məmnuniyyətlə istifadə edir:

“Doğrusu, daha çox avtomobildən istifadə edirəm. Amma elə vaxtlar olub ki, metroya minmişəm. Şəhərdə, əsasən də mərkəzi hissələrdə ictimai nəqliyyat əvəzsizdir”.

Naqif Həmzəyev isə tez-tez metrodan istifadə etdiyini deyib:

"Mən metrodan tez-tez istifadə edirəm. Hər həftə ən azlı bir-iki dəfə metroda oluram. Çünki tıxaclarla əlaqədar metrodan istifadə daha əlverişli olur. Bir də xüsusilə həftəsonları metro vasitəsilə bəzi yerlərə özüm və ya ailə üzvlərimlə bir yerdə gedirəm. Burada qeyri-adi bir şey yoxdur. Mən uzun illərdir ki, metrodan istifadə edirəm. Hər kəsi də ictimai nəqliyyatdan istifadə etməyə çağırıram".