Ötən gündən Azərbaycanda ölkə ərazisində hava şəraiti kəskin dəyişib. Qarlı hava şəraiti ilə əlaqədar külək və çovğun da müşahidə edilir.
Milli Hidrometeorologiya Xidməti ən çox qar yağan əraziləri açıqlayıb. Qeyd olunub ki, ən çox qar şimal-qərb bölgəsində müşahidə olunur.
Hazırda qarın hündürlüyü Zaqatalanın dağlıq ərazisi olan Əlibəydə 76, Qaxın dağ kəndi olan Sarıbaşda 52, Şəkidə 29 sm-dir.
Modern.az ucqar rayonların deputatları ilə əlaqə saxlayıb.
Saytımıza açıqlamasında Qusarın deputatı Azər Badamov bildirib ki, bu gün səhər tezdən Qusar Rayon İcra Hakimiyyətinin başçısı ilə telefonda danışıblar:
"Qusarda qarın yağması ilə bağlı hər hansı bir çətinlik yaşanmayıb. Bütün xidmət qurumları gücləndirlmiş iş rejimində fəaliyyət göstərir. Yollar vaxtında təmizlənib, elektrik, su və rabitə xidmətləri də fasiləsiz təmin olunur".
A.Badamov köməkçisi ilə də əlaqə saxladığını deyib: "Qarın yağması və havaların sərt soyumasının rayon sakinlərinin və rayona gələn turistılərin həyatı üçün hər hansı bir çətinlik yaratmayıb. Həm də seçicilərimdən də təqdim olunan xidmətlərlə bağlı hər hansı şikayət daxil olunmayıb. Qusar qarlı və soyuq iqlimə adaptasiya olunmuş rayondur. Bu baxımdan havaların şaxtalı olması və qarın yağması Qusar rayonu üçün adi haldır".
Lənkəranın deputatı Anar İskəndərov deyir ki, ryonda Bakıdakı kimi qasırğa da yoxdur. Təbii ki, Lənkəranda nəsə olursa, icra başçısı, bələdiyyəsi, hamısı oradadır. Eləcə də biz də buradayıq. Seçici üçün əlimizdən gələni edirik".
Balakənin deputatı Nəsib Məhəməliyev isə əhalinin qarı sevinclə qarşıladığını deyib:
"Balakən aqrar rayon oludğundan qarın yağması çoxdan arzulanan təbiət hadisədir. Tək Balakən üçün yox, bütövlükdə Azərbaycanın bütün rayonları üçün qarın yağması olduqca həyati əhəmiyyətli təbiət hadisəsidir. Çünnki qar yağmasa, bütün çaylarda su quruyacaq, su ehtiyyatları dağlarda azalacaq. Bu da quraqlığa səbəb olacaq. Beləliklə də təbii olaraq, ölkənin, rayonun iqtisadiyyatına, əhalinin sosial rifahına çox ciddi təsir göstərir. Bu olmadıqda aqrar sahənin inkişafından danışmaq mümkün deyil. Əhalimizin əhəmiyyətli hissəsi kənd təsərrüfatı ilə, fərdi təsərrüfat, eyni zamanda bağçılıqla məşğuldur. Bağçılıq da su ilə bağlı lan bir şeydir. Ona görə insanlar sevinclə qarşılayır. Heç bir əlavə çətinlik problem yaşanmır. Şikayətlər də daxil olmayıb".
