“Bu gün dünya tarixində insanlığa qarşı ən böyük cinayətlərdən olan Xocalı soyqırımının 33-cü ildönümüdür. Ermənilər tərəfindən törədilmiş bu cinayətin miqyası dəhşətlidir. Faciə zamanı qoca, qadın, uşaq demədən yüzlərlə dinc, günahsız insan xüsusi qəddarlıqla qətlə yetirilib. Xocalı qətliamının qurbanı olmuş bir çox insanların taleyi isə hələ də məlum deyil”.
Bu fikirləri Modern.az-a açıqlamasında Milli Məclisin deputatı Fatma Yıldırım deyib.
Deputat bildirib ki, bu gün dünyanın müxtəlif ölkələrində Xocalı soyqırımına həsr olunmuş tədbirlər keçirilir. Onun sözlərinə görə, tədbirlərdə diaspor təşkilatlarımız da fəal iştirak edirlər: “Mən də Avropada yaşadığım illərdə diaspor fəaliyyəti ilə məşğul olarkən rəhbəri olduğum Avropa Azərbaycanlıları Mərkəzi 2004-cü ilin fevralında Xocalı faciəsinin 12-ci ildönümü ilə bağlı Brüssel şəhərində, Avropa Parlamentinin binasının qarşısında, Şuman meydanı yaxınlığında aksiya keçirmişdi. Tədbirdə Xocalı soyqırımı haqqında Azərbaycan, türk, ingilis, fransız dillərində çıxışlar edildi, Avropa Parlamentinə doğru yürüş keçirildi, faciə ilə bağlı deklarasiyalar ictimaiyyətə paylanıldı. Aksiyada Avropadakı Türk icması da fəal iştirak etdi. Biz bu aksiya ilə yerli ictimaiyyətin diqqətini cəlb edə bilmişdik. Hələ o zaman ən böyük istəyimiz bu idi ki, Xocalı qətliamını törədən canilər öz layiqli cəzalarını alsınlar”
Hazırda erməni cinayətkarlarının Bakıda məhkəməsinin davam etməsinə diqqət çəkən millət vəkili onların arasında Xocalı cəlladlarının da olduğunu vurğulayıb: “30 illik işğal dövründə biz inanırdıq ki, günahsız insanların qatilləri gec-tez ədalət mühakiməsində cavab verəcəklər. Artıq həmin gün gəlib. Məhkəmədə onların törətdiyi dəhşətli cinayətlər açıqlanır. İnanırıq ki, onlar layiq olduğu cəzaları alacaqlar. Onlar üçün ən böyük cəzalardan biri də torpaqlarımızın işğaldan azad edilməsidir. Doğma Qarabağ torpağı bu gün dirçəlir və çiçəklənir. Biz bu torpaqlara əbədi qayıtmışıq. Bu gün Xocalı qurbanlarının, bütün şəhidlərimizin ruhu şaddır”.
Fatma Yıldırım qeyd edib ki, şanlı Ordumuz 44 günlük Vətən müharibəsində Xocalı faciəsi qurbanlarının da qisasını yerdə qoymadı. Bu döyüşlərdə Xocalı qatillərinin bir qismi öz layiqli cəzalarını aldılar. Xocalı şəhəri isə 2023-cü il sentyabrın 19-20-də Azərbaycan Ordusunun Qarabağda keçirdiyi antiterror tədbirləri nəticəsində separatçılardan təmizləndi. Azərbaycan Prezidenti, Müzəffər Ali Baş Komandan cənab İlham Əliyev 2023-cü il oktyabrın 15-də Xocalı şəhərində müqəddəs üçrəngli bayrağımızı ucaltdı.
“Xocalı soyqırımının dünyada tanıdılması işi bundan sonra da davam etməlidir. 2008-ci ildə Heydər Əliyev Fondunun vitse-prezidenti Leyla xanım Əliyevanın təşəbbüsü ilə başlanmış “Xocalıya ədalət!” beynəlxalq kampaniyası bu baxımdan böyük əhəmiyyət kəsb edir. Kampaniya bir çox ölkələrdə səmərəli şəkildə fəaliyyət göstərir. Sosial şəbəkələrdə təşviqat, sərgilər, toplantılar, müsabiqələr, konfranslar, seminarlar və digər tədbirlər kampaniyanın məqsədlərinə çatmaq üçün istifadə olunan səmərəli vasitələri təşkil edir. “Justice for Khojaly” informasiya portalı ermənilərin Xocalı soyqırımı ilə əlaqədar cinayətkar əməllərinin ifşa olunmasında müstəsna rola malik olan təbliğat platformasıdır. “Xocalıya ədalət” kampaniyasının strateji məqsədləri soyqırımının dünya ictimaiyyəti tərəfindən tanınması, ona hüquqi və siyasi qiymətin verilməsi, Ermənistan hökuməti tərəfindən Xocalı soyqırımına görə rəsmi üzr istənilməsi, bu hadisələrin bir daha törədilməyəcəyinə təminatın verilməsi və vurulmuş ziyana (maddi və mənəvi) görə tam olaraq kompensasiyanın ödənilməsidir. Bundan əlavə, Xocalı soyqırımı barədə dünya ictimaiyyətinin məlumatlılığının artırılması, soyqırımı qurbanlarının xatirəsinin yad edilməsi, sağ qalmış ailələrə dəstək göstərilməsi, bu hadisələrin yaddaşlarda yaşaması, xüsusən də gənc nəsil tərəfindən unudulmaması da kampaniyanın əsas məqsədləri sırasındadır. Görülən işlərin nəticəsidir ki, Xocalı soyqırımı bir çox ölkələrdə qəbul olunan parlament aktlarında tanınıb”.
Hamımız inanırıq ki, dünya ictimaiyyəti Xocalı şəhərində Azərbaycan xalqına qarşı törədilmiş soyqırımına gec-tez hüquqi qiymət verəcək, bu qanlı cinayətin törədilməsində təqsirkar olanların hamısı barəsində layiqli hökm çıxaracaq - deyə deputat vurğulayıb.
