Milli Məclisin deputatı Mübariz Qurbanlı “Qadın iştirakçılığının təbliği” tədbirində çıxışı zamanı səsləndirdiyi təklif müzakirələrə səbəb olub. Belə ki, o, həyat yoldaşlarını işləməyə qoyman kişilərin əməkhaqqından da qadının fonduna yığılması məsələsini qanuniləşdirilməsini təklif edib.
"Elə kişilər var ki, ailə quranda qadına işləməyə icazə vermirlər. Bu kimi hallar var təqaüd məsələsində təsir göstərə bilər. Belə hallarda kişinin əməkhaqqından qadının da pensiya fonduna yığıla bilər.
Məsələni qanuniləşdirmək olar. Buna kimsə etiraz etməməlidir, çünki kişinin özü qadını çalışmağa qoymayıb",-deputat deyib.
Deputatın təklifi özlüyündə müzakirələrə səbəb olub. Kişilərin bu cür "cəzalandırılması" bir çox sosial şəbəkə istifadəçisi tərəfindən tənqid edilib.
Mövzu ilə bağlı Modern.az-a açıqlamasında Milli Məclisin deputatı Elnarə Akimova bildirib ki, hər ailənin özünün mental dəyərləri, yanaşması var:
“Heç kəsə gəlib diqtə etmək olmaz ki, niyə həyat yoldaşını işləməyə qoyursan yaxud qoymursan. Bu ailənin dəyərləri ilə bağlı olan məsələdir. Mübariz müəllimin təklif etdiyi fikir qadının cəmiyyətdə daha özgüvənli olması, gələcəyini təminat altına alması baxımından söylənilib. O baxımdan təqdir etmək olar ki, əgər ailədə qadın işləmirsə, ancaq kişi çalışırsa, onun əməkhaqqından qadının pensiya fonduna ayrılsın. Bu mütərəqqi bir baxışdır. Mübariz müəllimin təklifi qadının gələcəyinin təminat altına alması baxımından yaxşı bir addımdır”.
