Azərbaycanda icra başçıları ilə deputatlar arasındakı münasibətlər daim müzakirə mövzusu olub. Bəzi hallarda deputatlar icra hakimiyyəti orqanlarının onlarla əməkdaşlıq etmədiyini, hətta rəsmi tədbirlərə dəvət olunmadıqlarını bildirirlər. Onların sözlərinə görə, bəzi icra başçıları qanunla nəzərdə tutulan öhdəliklərə əməl etmir və deputatları qəbul etməkdən yayınırlar.
Bəzi deputatlar deyir ki, bəzən icra başçıları məsələni şəxsiləşdirir, şəxsi münasibətlərə görə ümumi işə xələl gətirirlər və nəticədə seçicilərin problemlərinin həlli gecikir.
Modern.az-a açıqlamasında Milli Məclisin Aqrar siyasət komitəsinin sədri Tahir Rzayev hər hansı deputatla icra başçısı arasında münasibətlərdə soyuqluq olduğunu eşidəndə təəccübləndiyini bildirib:
“İcra başçısı da, deputat da xalqın xidmətçisidir. Hər iki məsul şəxs ölkənin inkişafına, insanların rahatlığının təmin olunmasına, sosial-iqttisadi inkişafın sürətləndirilməsinə xidmət edir. Buna görə də bu iki şəxs arasında heç bir ziddiyyət olmamalıdır. Hesab edirəm, belə hallar nadirən baş verə bilər. Uzun illərdir ki, parlamentdə təmsil olunuram, bir neçə icra başçısı ilə işləmişəm. Münasibətlər daim normal olub. Məqsədimiz eyni olub. Müəyyən məsələləri, insanları narahat edən problemləri bir yerdə həll etməyə çalışmışıq. Çox vaxt rayon tədbirlərində bir yerdə olmuşuq, bayramlarda, yaslarda birgə iştirak etmişik. Bu, əlbəttə ki, bizim vəzifəmiz və borcumuzdur. Bəzi hallarda eşidəndə ki, hansısa deputatla icra başçısı arasında müəyyən soyuqluq var, təəccüblənirəm. Necə ola bilər? Deputatın özünün statusu, İcra hakimiyyəti orqanının öz əsasnaməsi var. Əlbəttə ki, ayrı-ayrı səlahiyyətlər, vəzifələr olsa da, məqsəd birdir-dövlətə, xalqa xidmət. Hansısa münasibətlərdə soyuqluq varsa, burada parametrlər pozulur".
Qeyd edək ki, “Deputatın statusu haqqında” qanuna əsasən, millət vəkilləri icra hakimiyyəti orqanlarının rəhbərləri tərəfindən təxirə salınmadan qəbul edilməlidirlər.
Lakin bəzi deputatlar bu maddənin icra olunmadığını, icra başçılarının onlarla əməkdaşlıqdan yayınmaq üçün müxtəlif bəhanələr gətirdiklərini bildirirlər. Bu da bölgələrdə problemlərin həllini ləngidir, seçicilərlə effektiv ünsiyyət qurulmasına mane olur.
Komitə sədri vurğulayıb ki, bu hallara yol verilməməlidir: "Belə hallar mövcuddursa, aradan qaldırılmalıdır. Çünki insanlar hər şeyi görür və duyur. Münasibətlərdə ayrı-seçkilik varsa, rayonun ümumi işinə ziyan gətirir, insanların diqqətini tamam başqa səmtə yönəldir və paralellik yaradır. Deputatın yaxınları icra başçısının gözündən düşür, ya da icra başçısının yaxınlarına onun vəzifəyə qoyduğu adamlara deputat başqa gözlə baxır. Düşünürəm ki, belə hallar bizim ümumi mənafeyimizə, mövqelərimizə ziddir. Biz səmimi şəraitdə işləyirik. Rayonda olanda, əlbəttə, adamları qəbul edirəm, lazım olanda tək özüm kəndlərə gedirəm, məktəblərdə oluram. Müəyyən qrup insanlarla öz təşəbbüsüm ilə görüşlər keçirirəm. Lakin rayon icra başçısını məlumatlandırıram ki, sabah mən filan yerdə insanlarla görüşəcəm. Yenə deyirəm ki, bizi ümumi məqsədlər birləşdirir".
Bir çox deputat isə təmsil olunduğu rayonun icra başçısından şikayətçi deyil, yaxşı əlaqələr qurduğunu, ciddi problem yaşamadıqlarını bildirir. Bu isə bir daha sübut edir ki, məsələ konkret icra başçılarının şəxsi yanaşmasından qaynaqlanır.
