"Azərbaycan Respublikasının Prezidenti İlham Əliyevin Almaniya Federativ Respublikasının Prezidenti Frank-Valter Ştaynmayerin Azərbaycana rəsmi səfəri zamanı verdiyi bəyanat, iki ölkə arasında strateji tərəfdaşlığın dərinləşməsini və yeni əməkdaşlıq mərhələsinə qədəm qoymasını nümayiş etdirir."
Bu sözləri Modern.az saytına açıqlamasında Milli Məclisin deputatı Azər Kərimli deyib.
Millət vəkili qeyd edib ki, iki ölkə arasında əlaqələrin inkişafını iqtisadi münasibətlərdə yaranmış dinamika da təsdiqləyir:
“Prezident İlham Əliyevin çıxışında vurğuladığı əsas məqamlardan biri iki ölkə arasında ticarət dövriyyəsinin sürətli artımıdır. 2024-cü ilin ilk iki ayında ticarət dövriyyəsinin təxminən üç dəfə artması enerji resursları, xüsusilə Azərbaycanın Almaniyaya xam neft ixracının yüksəlməsi ilə əlaqələndirilir. Bu göstərici ikitərəfli iqtisadi münasibətlərin pozitiv dinamika nümayiş etdirdiyini göstərir. Bununla yanaşı, Azərbaycan tərəfi ticarət əlaqələrinin yalnız enerji resursları ilə məhdudlaşdırılmaması, bərpaolunan enerji sahəsində əməkdaşlığın genişləndirilməsi üçün konkret planlara malik olduğunu bəyan etmişdir. Azərbaycanın 2030-cu ilə qədər 6 giqavat həcmində bərpaolunan enerji istehsalı məqsədi və bu istiqamətdə Almaniya şirkətləri ilə əməkdaşlıq perspektivləri, enerji təhlükəsizliyi və yaşıl transformasiya baxımından böyük əhəmiyyət daşıyır”.
Azər Kərimlinin sözlərinə görə, Almaniya Prezidentinin Azərbaycana ilk rəsmi səfəri ikitərəfli münasibətlərdə yeni mərhələnin başlanğıcı kimi qiymətləndirilə bilər:
“Səfər çərçivəsində müzakirə olunan məsələlər – iqtisadi əlaqələrin diversifikasiyası, yaşıl enerji sahəsində əməkdaşlıq, regional təhlükəsizlik və beynəlxalq iqlim gündəliyi iki ölkə arasında strateji tərəfdaşlığın dərinləşəcəyini göstərir.
Bu səfər həm Azərbaycanın beynəlxalq siyasi çəkisinin artmasına, həm də regionda dayanıqlı sülhün və sabitliyin təmin olunmasına mühüm töhfə verəcək”.
Deputatın sözlərinə görə, Azərbaycan-Almaniya münasibətləri strateji və çoxtərəfli əməkdaşlıq baxımından əhəmiyyətli perspektivlər vəd edir:
“İki ölkə arasında diplomatik əlaqələr 1992-ci ildən qurulub və o vaxtdan bəri siyasi, iqtisadi, enerji, mədəni və humanitar sahələrdə inkişaf etməkdədir. Almaniya Azərbaycanın əsas ticarət tərəfdaşlarından biridir və Aİ daxilində Azərbaycanla əməkdaşlığa xüsusi önəm verən dövlətlərdən sayılır.
Azərbaycan Almaniyanı və bütövlükdə Avropanı təbii qazla təmin edən mühüm ölkələrdən biridir. Xüsusilə Cənub Qaz Dəhlizi çərçivəsində əməkdaşlığın daha da genişləndirilməsi mümkündür. Almaniyanın bərpa olunan enerji texnologiyalarında qabaqcıl olması Azərbaycanda yaşıl enerjiyə keçid prosesinə töhfə verə bilər. Bu xüsusda, gələcəkdə Azərbaycanın işğaldan azad edilmiş ərazilərində günəş və külək enerjisi layihələrində Almaniya şirkətlərinin iştirakı ehtimalı da nəzərdən keçirilə bilər. Prezidentlərin mətbuata bəyanatlarında qeyd olunduğu kimi, Almaniyada təhsil alan azərbaycanlı tələbələrin sayı artmaqdadır. Perspektivdə bu sahədə əməkdaşlıq dərinləşdirilərək daha çox təqaüd və mübadilə proqramları təşkilində iki ölkə arasında humanitar əlaqələrin genişləndirilməsi üçün yeni imkanlar yaradır. Bununla yanaşı, məlum olduğu kimi Azərbaycanın Şərq-Qərb nəqliyyat dəhlizində artan rolu və aparıcı mövqeyi Almaniyanın diqqət mərkəzindədir. Xüsusilə Orta Dəhliz vasitəsilə Almaniya Asiya bazarlarına daha sürətli və təhlükəsiz çıxış əldə edə bilər”.
