Ermənistanın xarici işlər naziri Ararat Mirzoyan Türkiyənin NTV kanalına müsahibə verib. O, müsahibəsində sülh sazişinin imzalanmasından danışıb.
"Ermənistan Azərbaycanla sülh sazişinin həm sərhəddə, həm də üçüncü ölkədə imzalanması ehtimalını nəzərə alır. Biz hesab edirik ki, indi sazişin imzalanması üçün yer, vaxt və dəqiq tarixin müəyyənləşdirilməsi məsələləri üzrə dərhal məsləhətləşmələrə başlamaq olar. Bu, Ermənistan və Azərbaycanın sərhədi ola bilər, həm İrəvan, həm də Bakı üçün məqbul olan hər hansı üçüncü ölkə də ola bilər. Bütün bunlar müzakirə mövzusuna çevrilə bilər", - deyə o qeyd edib.
Mirzoyan 15 dəqiqəyə yaxın davam edən müsahibədə Azərbaycanın şərtləri ilə bağlı fikir bildirməyib. Ancaq rəsmi Bakı sülh üçün iki şərtin yerinə yetirilməli olduğunu bəyan edib. Bunlardan biri Minsk Qrupunun buraxılması, digəri Ermənistan Konstitusiyasının dəyişdirilməsidir.
Modern.az-a açıqlamasında Beynəlxalq münasibətlər və parlamentlərarası əlaqələr komitəsinin sədri Səməd Seyidov bildirib ki, Ermənistan tərəfi həmişə eyni valı oxudur:
"Onların fikri və mövqeyi aydındır. Sadəcə olaraq istəyirlər ki, müqavilə xatirinə sülh sazişini imzalayıb, real barışıq üçün heç bir addım atmasınlar. Biz mövqeyimizi açıq şəkildə bəyan etmişik. Sülh müqaviləsinin imzalanması iki şərtin yerinə yetirilməsindən - Minsk qrupunun ləğvi, konstitusiyanın dəyişdirilməsindən sonra baş tutacaq. Onlar bundan çəkinirlər. Çəkindikləri halda dünyaya özlərini sülh göyərçini kimi təqdim etmək üçün gündə sərhəddə görüşmək, komitə sədrləri səviyyəsində görüşmək, nəyisə imzalamaq, sülh sazişini imzaladıqdan sonra Minsk qrupunun ləğvi üçün müraciət etmək kimi ağlasığan-ağlasığmaz bəyanatlar verirlər. Bunların hamısı bir məqsədə xidmət edir: müqavilə dayanaqlı və əbədi olmasın, onlar öz dividentlərini bu parça kağızda əldə etsinlər. Biz bunların içini də, niyyət və davranışlarını da çox yaxşı bilirik. Ona görə də israrlıyıq".
Komitə sədri vurğulayıb ki, Antalya Diplomatiya Forumunda Azərbaycan xarici işlər naziri çox yüksək səviyyədə məsələləri təqdim edib: "Üzr istəyirəm ifadəmə görə, nə qədər hoppanıb düşsələr də, bu şərtləri yerinə yetirməsələr, o sülh müqaviləsini imzalamağın heç bir mənası yoxdur".
