VI çağırış Milli Məclisdə Kəlbəcəri təmsil edən Aqil Məmmədov pensiya almağa başlayıb.

Bu barədə Modern.az-a deputatın özü məlumat verib.

O bildirib ki, deputat fəaliyyəti başa çatdıqdan sonra işləmir, evdədir:

"Aprelin 1-də mən pensiya yaşına çatdım. Hələlik evdəyəm. Amma rayon ictimaiyyəti, ziyalılarımız mənim Kəlbəcər Rayon Ağsaqqallar Şurasına sədrliyim məsələsini qaldırdılar. Bunu Respublika Ağsaqqallar Şurası da qəbul etdi. Oradan da gələn nümayəndələrin iştirakı ilə ayın 14-də konfrans keçirildi. Açıq səs vermədə yoldaşlar mənim sədrliyimə səs verdilər. Mən də bunu məmnuniyyətlə qarşıladım. İctimai iş olsa da, çox məsuliyyətli məsələdir. Harada olursa-olsun dövlətin siyasətinin təbliği, eyni zamanda rayon ictimaiyyətində sabitliyin daha da vüsət alması, gənclərlə ziyalı ağsaqqallarımızla əlaqələrin və birliyin qurulması istiqamətində işimizi davam etdirəcəyik". 

A.Məmmədov deputat həmkralarından bəziləri ilə arabir əlaqə saxladıqlarını da deyib:

"Deputat həmkarlarımızla zəngləşirik. Parlamentin fəaliyyətini izləyirəm. Azərbaycan parlamenti həqiqətən üzərinə düşən işi yüksək səviyyədə icra edir, təmaslar yaxşıdır. Gündəmdə olan məsələlər geniş müzakirə və təhlil olunur. Kiminsə fikirlərinə qarşı heç bir məhduiyyət yoxdur. Lazımi qərarlar verilir. Parlamentin fəaliyyətindən tam razıyam. Bütün deputatlarla yox, yaxın yoldaşlarla əlaqələrimiz var. Arabir onlarla zəngləşirik. Ad çəkmək istəmirəm. Birinin adını çəkib, digərinin çəkməmək məncə yaxşı olmaz".