Aprelin 21-də Bakıda Türk Dövlətləri Təşkilatının himayəsində fəaliyyət göstərən Beynəlxalq Türk Akademiyası və Sosial Tədqiqatlar Mərkəzinin (STM) birgə təşkilatçılığı ilə “Türk Barometri 2024 - Türk dövlətlərində təhsil və elm sahəsində əməkdaşlıq: Mövcud reallıqlar və gələcəyə baxış” mövzusunda beynəlxalq konfrans keçirilib.
Modern.az xəbər verir ki, Konfransda təqdim edilən “Türk Barometri 2024” tədqiqat layihəsi Türk Dünyası 2040 Vizyonu çərçivəsində həyata keçirilib və elm, təhsil sahəsində türk dövlətləri arasında əməkdaşlığa dair ictimai rəyləri, təhlilləri əhatə edir.
Milli Məclisin deputatı, siyasi elmlər doktoru Rizvan Nəbiyev Konfransda müzakirələrə qatılaraq təklif edib ki, Türk dövlətlərinin universitetləri arasında tələbə mübadiləsinin sistemli və intensiv şəkildə təşkili üçün Dədə Qorqud və ya digər birləşdirici adı daşıyan təqaüd proqramı təsis edilsin. Bu təqaüdlə tələbələrə təhsil müddətində ən azı bir semestr seçdiyi türk dövləti universitetində təhsil almaq imkanı verilsin. Avropa İttifaqının Socrates proqramı model kimi nəzərdən keçirilə bilər.
