Milli Məclisin deputatları hər ay iki dəfə seçiciləri ilə görüşürlər. Deputatlar təmsil etdikləri dairənin insanları ilə bir araya gəlir, onların problemlərini dinləyir və onların həll olunmasında səlahiyyətləri çərçivəsində çalışırlar.

Bu görüşlərdə neçə nəfər seçicinin iştirak etməsi maraq doğurur.

Modern.az-a açıqlamasında Milli Məclisin deputatı Vüqar Bayramov görüşlərə orta hesabla 40-50 nəfərin gəldiyini bildirib:

“Ayda iki dəfə seçicilərimizlə görüşlərimiz təşkil olunur. Görüşlərdə iştirak edən seçicilərin sayı fərqli olur. Mən hər ay bir dəfə Horadiz şəhərində, bir dəfə də Füzuli rayonun kənd yaşayış məntəqəsində görüşürəm. Orta hesabla görüşlərə 40-50 nəfər gəlir. Amma mənə həm təmsil etdiyim dairədən, həm də respublikamızın digər yaşayış məntəqələrindən yazılı, eyni zamanda sosial şəbəkə üzərindən müraciət alıram. Deputatların statusuna uyğun və səlahiyyətləri çərçivəsində həmin qayğıların həllinə kömək edək. Amma hər ay iki dəfə görüşlərimiz mütəmadi olaraq keçirilir. Ay ərzində keçirilən iki görüşdə təxminən 100-ə yaxın seçici ilə görüşmə imkanımız olur”.

Deputat Ceyhun Məmmədov görüşlərdə bəzən 10, bəzən də 15 və ya 20 nəfər seçicinin görüşlərdə iştirak etdiyini söyləyib: “Bəli, deputatların seçiciləri ilə görüşü minimum ayda iki dəfə keçirilir. Bundan əlavə davamlı olaraq müxtəlif görüşləri davam etdirik. Görüşlərdə bəzən 10, bəzən 15 və ya 20 nəfər iştirakçının olduğu olub. Bu nə qədər insanın görüşə yazılmağından asılıdır. Məsələn sonuncu görüşümzdə 15 nəfər olub”.