Naxçıvan Muxtar Respublikasının Konstitusiyasının dəyişdirilməsinə hazırlıq gedir. Ali Məclisin yaz sessiyasında “Naxçıvan Muxtar Respublikasının Konstitusiyasında dəyişikliklər edilməsi haqqında” qanun layihəsi müzakirə olunub.
Rəsmi açıqlamada bildirilir ki, muxtar respublikada həyata keçirilən struktur islahatları, səlahiyyətli nümayəndəlik institutunun yaradılması, yeni idarəçilik qaydalarının tətbiqi, dövlət orqanlarının yenidən formalaşdırılması və qanunvericilik sisteminin təkmilləşdirilməsi kimi tədbirlər Naxçıvan Muxtar Respublikası Konstitusiyasında da dəyişikliklərin edilməsini zəruri edib.
Hazırlanmış qanun layihəsi qeyd olunanları əhatə etməklə muxtar respublikada yeni idarəetmə modelinin tətbiqini nəzərdə tutur. Ancaq Konstitusiyada nələrin dəyişəcəyi hələlik məlum deyil.
Modern.az-ın ötən ay verdiyi məlumata görə, Naxçıvan Konstitusiyasında ən vacib dəyişikliklərdən biri Naxçıvan Ali Məclisinin sədrinin xüsusi statusu ilə bağlıdır. Dəyişiklik əsasında Ali Məclisin sədrinin “ali vəzifəli şəxs” statusu ləğv edilə bilər. Qeyd edək ki, Ali Məclisin sədrinin həm qanunverici orqana rəhbərlik etməsi, həm də ali vəzifəli şəxs olması birmənalı qarşılanmır. Dəyişikliklərdən sonra hüquqi problem aradan qaldırılacaq.
Milli Məclisin komitə sədri Fazil Mustafa saytımıza açıqlamasında bildirib ki, qanunvericiliyə görə, Naxçıvan Muxtar Respublikasının Konstitusiyasına hər hansı dəyişiklik və əlavələr olanda məsələ ilə bağlı iki dəfə səsvermə keçirilir:
"Səsvermələr arasında 3 ay müddət olur. Birinci səsvermədən 3 ay sonra dəyişiklikləri qəbul edib, Azərbaycan Respublikası Milli Məclisinə ünvanlayırlar. Milli Məclisdə də onunla bağlı müvafiq qərar çıxarılır:ya təsdiq olunur, ya da təsdiq olunmur. Hansısa düzəlişə, konstitusiyaya uyğunluğuna iradlar varsa, bu da təzədən qaytarılır, onlar yenidən məsələyə baxa bilirlər. Amma praktikada belə bir hadisə yaşanmayıb, göndərilən layihələr qəbul olunub. Milli Məclis tərəfindən ayrıca qərar qəbul olunub, təsdiq olunandan sonra dəyişiklik və düzəlişlər qüvvəyə minir. Ona görə də bu müəyyən prosedur tələb edir. Bunu nəzərə alaraq təkilflər düzəlişlər göndəriləcək və onun əsasında burada müzakirə olunub, qərar qəbul olunacaq".
Beləliklə, Naxçıvan Muxtar Respublikasının Konstitusiyasında dəyişikliklərlə bağlı qanun layihənin ilk iclasından 3 ay sonra - yəni may ayında növbəti dəfə müzakirə olunacaq və layihə Azərbaycan Respublikasının Milli Məclisinə təqdim olunacaq.
