“Fövqəladə Hallar Nazirliyi (FHN) yarandığı dövrdən 20 il ərzində daim öz peşəkarlığı ilə seçilib. FHN təbii fəlakətər zamanı əhalinin yanında olub, mümkün olan bütün dəstəyi verib. Bu, cəmiyyət arasında da çox müsbət qarşılanır”.
Modern.az xəbər verir ki, bu fikirləri Milli Məclisin plenar iclasında Hüquq siyasəti və dövlət quruculuğu komitəsinin sədri Əli Hüseynli deyib.
Onun sözlərinə görə, FHN nəinki Azərbaycanda, xarici ölkələrdə də baş vermiş hadisələrə daim operativ reaksiya verir:
“Hamımız xatırlayırıq ki, bir neçə il əvvəl Türkiyədə baş vermiş ağır zəlzələ nəticəsində köməyə ilk çatan məhz FHN-in əməkdaşları oldu. Onlar böyük fədakarlıq göstərdilər, qardaş Türkiyə xalqına öz dəstəyini verdilər. Bu baxımdan hesab edirəm ki, bu 20 illik yol şərəfli yoldur. Cənab Prezident tərəfindən FHN-in 20 illik yubiley medalının təsis olunması da bu baxımdan təsadüfi deyil. Qeyd etməliyəm ki, bu yubiley medalı Azərbaycanın orden və medallarla bağlı qanunvericiliyinə tam uyğundur. Əsasnaməsində və təsvirində həm FHN-ni, həm də milli atributları özündə tam əhatə edir”.
