İran Prezidenti Məsud Pezeşkian 28 aprel tarixində ölkəmizə səfər etdi, Prezident İlham Əliyevlə ikitərəfli görüşlər keçirdi, eləcə də Azərbaycan-İran Biznes Forumuna qatıldı. İki ölkə arasında bir sıra müqavilələr imzalandı.

Ümumilikdə bu səfərdən sonra iki ölkə arasında müxtəlif sahələrdə əlaqələrin müsbətə doğru dəyişilməsi müşahidə olunur. Eləcə də parlament sahəsində əlaqələrin güclünməsinə şərait yaranıb.

Azərbaycan-İran və İran-Azərbaycan dostluq qruplarının görüşüb-görüşməyəcəyi də eyni zamanda diqqətçəkən məqamlardandır.

Modern.az-a açıqlamasında Milli Məclisin Azərbaycan-İran Parlamentlərarası İşçi Qrupunun üzvü Aydın Mirzəzadə bildirib ki, İran paytaxtında Azərbaycan səfirliyinə terror hücumu olduqdan sonra bütün sahələrdə olduğu kimi, parlamentlərarası əlaqələrdə də münasibətlər dayanıb.

Onun sözlərinə görə, İranın yeni prezidentinin ölkəmizə səfərindən sonra şübhəsiz ki, parlamentlərarası əlaqələrin artıq bərpa edilməsinə ehtiyac var:

"Birinci imkan olan kimi parlamentlərarası dostluq qrupları görüşəcəklər. Əlaqələrin daha da möhkəmlənməsi üçün yollar müzakirə ediləcək. Parlamentlər vasitəsilə artıq liderlərimizin yaxşı münasibətlərinə dəstək nümayiş etdirmək yollarını müzakirə edəcəyik. Hesab edirəm ki, Azərbaycan-İran əlaqələrinin möhhkəmlənməsində parlament üzvlərinin rolu böyükdür".