Milli Məclisin deputatları, Azərbaycan-Zimbabve parlamentlərarası əlaqələr üzrə işçi qrupunun üzvləri Zaur Şükürov və Məzahir Əfəndiyev Zimbabve parlamentinin dəvətinə əsasən 4-8 may tarixlərində bu ölkəyə səfər edib.
Modern.az-ın məlumatına görə, səfər çərçivəsində Zimbabve parlamentinin sədri Jacob Francis Nzvidamilimo Mudenda, Parlamentin Beynəlxalq əlaqələr və ticarət komitəsinin sədri, eyni zamanda Zimbabve - Azərbaycan dostluq assosiasiyasının rəhbəri Vebster Kotivani Şamu, xarici işlər və beynəlxalq ticarət nazirinin müavini Sheilla Chikomo ilə keçirilən görüşlər zamanı qanunverici orqanlar arasında əlaqələrin genişləndirilməsi, o cümlədən təcrübə mübadiləsinin həyata keçirilməsi, iki ölkə arasında ikitərəfli və çoxtərəfli platformalarda, xüsusilə də Qoşulmama Hərəkatında və QH Parlament Şəbəkəsində əməkdaşlığın mövcud vəziyyəti və inkişaf perspektivlərinə dair müzakirələr aparılıb.
Milli Məclisin deputatları həmçinin Zimbabvenin azadlığı uğrunda mübarizə aparmış və həlak olmuş şəxslərin xatirəsinə paytaxt Hararedə ucaldılmış abidəni ziyarət edib.
Görüşlər zamanı Zimbabve tərəfi Azərbaycan Prezidenti İlham Əliyevlə Zimbabve Prezidenti Emmerson Mnanqaqva arasında keçən ilin noyabr ayında COP29 çərçivəsində Bakı şəhərində baş tutan görüşdə müzakirələrdən irəli gələrək, qarşılıqlı maraq kəsb edəcək sahələrin müəyyənləşdirilməsinin zəruriliyini bildirib.
Qeyd edilməlidir ki, Zimbabve Parlamentinin Beynəlxalq əlaqələr və ticarət komitəsinin sədri, eyni zamanda Zimbabve - Azərbaycan dostluq assosiasiyasının rəhbəri Vebster Kotivani Şamu ilə görüş zamanı o, Azərbaycanın son dövrlər əldə etdiyi uğurları, ölkənin davamlı iqtisadi inkişafa nail olmasını diqqətlə izlədiklərini və ölkəmizin bu “uğur hekayəsi”nin onlar üçün çox faydalı təcrübə ola biləcəyini və məhz bu səbəbdən Azərbaycanla əlaqələrin inkişaf etdirilməsində maraqlı olduqlarını vurğulayıb. İki ölkə arasında əməkdaşlığın inkişafında parlament diplomatiyasının roluna diqqət çəkən zimbabveli parlamentarilər parlamentlərarası əməkdaşlığın genişləndirilməsinin zəruriliyi bildirilərək, qarşılıqlı səfərlərin həyata keçirilməsinin vacibliyi diqqətə çatdırıb. Həmçinin, qadın parlamentarilər arasında əlaqələrin qurulmasının əhəmiyyəti qeyd olunub.
Bir sıra istiqamətlər üzrə Azərbaycanla əməkdaşlığın inkişaf etdirilməsinin nəzərdən keçirildiyini deyən Zimbabve tərəfi mədən sənayesi, enerji resurslarının tədqiqi və istehsalı, həmçinin yaşıl enerji, ticarət, turizm, təhsil, kənd təsərrüfatı, infrastruktur, texnologiya, su ehtiyatlarının idarə olunması kimi sahələrin prioritet olduğunu bildirib. Bu xüsusda, Zimbabvenin əlvan metal ehtiyatları ilə zəngin olduğunu, kənd təsərrüfatının ölkə iqtisadiyyatında payının yüksək olmasını, flora və faunanın zənginliyini nəzərə alaraq, bu istiqamətlər üzrə əməkdaşlığın qurulması üçün geniş perspektivlər olduğu qeyd edilib. Təhsil sahəsində müzakirələr çərçivəsində Zimbabve tərəfi universitetlərarası əməkdaşlığın qurulması və Azərbaycan hökumətinin təqdim etdiyi təqaüd proqramlarından yararlanmaq niyyətini ifadə edib.
Həmçinin, zimbabveli rəsmilər çoxtərəfli formatda əməkdaşlığın genişləndirilməsinin vacibliyini qeyd edərək, Qoşulmama Hərəkatına ölkəmizin uğurlu sədrliyini və prezident İlham Əliyevin sədrlik dönəmində hərəkat çərçivəsində əməkdaşlığın intensivləşdirilməsi istiqamətində atdığı vacib addımların və irəli sürülən təşəbbüslərin xüsusilə təqdirəlayiq hal olduğunu vurğulayıb.
Azərbaycan Respublikası Milli Məclisinin deputatları görüşlər əsnasında müasir Azərbaycan dövlətinin banisi, Ulu öndər Heydər Əliyevin xalqımız və Vətənimiz qarşısında misilsiz xidmətləri və ölkəmizin gələcək inkişafına hesablanmış uzaqgörən siyasəti, bu siyasi kursun məhz Prezident cənab İlham Əliyev tərəfindən son dərəcə uğurla davam etdirilməsi nəticəsində Azərbaycanın davamlı inkişafa nail olduğunu, beynəlxalq miqyasda nüfuzunun ilbəil artdığını qeyd edib.
Bu xüsusda, ölkəmizin həyata keçirdiyi uğurlu daxili və xarici siyasət kursu, Ermənistanın onilliklər boyu davam etdirdiyi işğalçılıq və vandalizm siyasəti, tarixi torpaqlarımız olan indiki Ermənistandan zorla qovulmuş soydaşlarımızın öz ata-baba yurdlarına qayıdış hüququ, 44 günlük Vətən müharibəsi və bir günlük antiterror tədbirləri nəticəsində torpaqlarımızın beynəlxalq hüququn hamılıqla qəbul edilmiş prinsipləri və BMT Təhlükəsizlik Şurasının məlum 4 qətnamələri əsasında işğaldan azad edilməsi prosesi, mina problemi, azad olunmuş ərazilərimizdə hökumətimiz tərəfindən həyata keçirilən genişmiqyaslı yenidənqurma və quruculuq işləri, keçən ilin noyabr ayında ölkəmizdə uğurla baş tutan COP29 tədbiri barədə ətraflı məlumat təqdim edilib.
Eyni zamanda, Qoşulmama Hərəkatına və Hərəkatın Parlament şəbəkəsinə sədrlik çərçivəsində ölkəmizin uğurlu fəaliyyəti və hərəkat çərçivəsində çoxtərəfli səmərəli dialoqun formalaşdığı vurğulanıb.
Milli Məclisin deputatı Zaur Şükürov səfərin yekunlarına dair Zimbabvenin dövlət televiziya kanallarına müsahibə verib və səfər yerli mediada işıqlandırılıb.
