Milli Məclis Azərbaycan siyasi sisteminin mühüm hakimiyyət orqanıdır. Dövlətin qanunverici bazasını formalaşdıran bu qurumun üzvləri - deputatlar isə ictimai nüfuz baxımından xüsusi çəkisi olan şəxslər kimi qəbul olunurlar. Adətən deputat sözü ictimaiyyət arasında hörmət, diqqət və məsuliyyət anlayışları ilə assosiasiya olunur. Onların bölgələrə səfərləri, tədbirlərdə iştirakı və vətəndaşlarla təması yerlərdə diqqətlə izlənilir.
Lakin müşahidələr göstərir ki, son illər deputatlara yanaşma tədricən dəyişir. Bəzi hallarda ictimaiyyət nümayəndələri, rəsmi və qeyri-rəsmi tədbirlərinin təşkilatçıları Milli Məclis üzvlərinə münasibətində etinasızlıq nümayiş etdirirlər. Bu etinasızlıq təkcə susqun, passiv deputatlarla bağlı deyil. Hətta parlamentin aktivliyi və təşəbbüskarlığı ilə seçilən üzvləri belə bir çox tədbirlərə yalnız formal dəvətlə çağırılır, bəzən isə tamamilə prosesin kənarında qalırlar.
Milli Məclisin komitə sədri Fazil Mustafa mövzu ilə bağlı Modern.az-a bildirib ki, bəzən hansısa tədbirin təşkilatçıları ora gələn adamın kimliyini bilmədikiləri, onları tanımadıqları üçün həmin şəxsləri diqqətdən kənarda saxlayırlar. Burada əsas məsələ status deyil, fərdidir:
“Faydalı hesab etdiyim tədbirlərə zaman uyğun gəlirsə, çalışıram ki, gedim. Çox tədbirlərə dəvət alırıq, lakin vaxt və səmərəlilik baxımından bütün tədbirlərə getmək uyğun olmur. Amma çalışıram ki, dəvət edən şəxsləri narazı salmayım. Özüm də getməsəm, yerimə kimisə göndərməyə çalışıram. Təbii ki, tədbirə dəvət edən şəxslər və qurumlar da mənim üçün önəmlidir. Dövlət əhəmiyyətli rəsmi tədbirlərə bacardığım qədər qatılıram”.
Tədbir təşkilatçıları deputatları tanımır
“Tədbir təşkilatçıları gələn adamın statusu nədir, hansı məqsədlə çağırılıb - bu sualların cavabını bəzən bilmirlər. Nəticədə belə məsələlər ortaya çıxır. Amma bizim belə problemimiz çox olmur. Əksəriyyət bilir ki, kimik və ona uyğun münasibət göstərirlər. Bu səbəbdən də özəl münasibət göstərilir”.
“Mən bu məsələlərin geniş müzakirəsinin tərəfdarı deyiləm. Hesab edirəm ki, tədbirlərdə ümumi qarşılanma normaldır. Burada ciddi problem yoxdur. Bəzən hansısa anlaşılmazlıqlar olur, yerləşdirilmədə problemlər mümkündür. Lakin belə hallar az-az baş verə bilər”, - bunu isə saytımıza açıqlamasında deputat Ceyhun Məmmədov deyib.
Onun sözlərinə görə vətəndaşların əksəriyyəti deputatları öz tədbirlərində görmək istəyirlər:
“Bizim günümüzün bir hissəsi tədbirlərdə iştiraka gedir. Ümumən böyük problem yoxdur. Biz zamanla bəzi çatışmazlıqları müşahidə edirik və görə bilirik”.
“Düşünürəm ki, bu məsələlərdə təşkilatçılar diqqətli olmalıdırlar. Deputatlıq yüksək vəzifədir. Söhbət ən ali dövlət institutlarından birinin təmsilçiliyindən gedir. Vətəndaşlar bu institutlara hörmətlə yanaşmalıdır”, - deyə sonda o qeyd edib.
İctimaiyyətdə geniş müzakirə olunan bu məsələnin əsas səbəblərindən biri kimi yeni seçilən deputatların cəmiyyətdə kifayət qədər tanınmaması göstərilir. Xüsusilə də son parlament seçkilərindən sonra formalaşan yeni tərkibdə - VII çağırışda bir çox deputatlar ictimaiyyət üçün tamamilə yeni simalar oldular. Onların bir qismi peşəkar sahələrdən gəlsələr də, əvvəldən mediada, vətəndaş cəmiyyətində və ya ictimai platformalarda aktiv deyldilər. Hətta parlamentə seçiləndən sonra da qeyri-fəallıq, səssizlik nümayiş etdirirlər ki, nəticədə də geniş ictimai rəyin diqqətindən kənarda qalırlar.
Əvvəllər deputat seçilən şəxslər bir qayda olaraq, ya siyasi partiya fəaliyyəti ilə ya da cəmiyyətə açıq çıxışları ilə tanınan simalar olurdu. Onların həm yerli, həm də milli səviyyədə nüfuzu formalaşmışdı. Bu nüfuz seçkilərdən sonra deputat–cəmiyyət münasibətində körpü rolunu oynayırdı. Son dövrlərdə isə ictimai-siyasi fəallığı olmayanların parlamentdə çox yer alması, onların cəmiyyətdə baş verən hadisələrə seyrçi və laqeyd qalması, səslərini çıxarmaması deputat nüfuzunu da zədələyib.
