“İyulun 1-dən artıq qohum evlilikləri ilə bağlı məsələ qüvvəyə minir. Bütün media suyektlərində bu yetəri qədər təbliğ olunur, amma insanların çoxu bu dəyişikliyə hazır deyil”.

Modern.az xəbər verir ki, bu  sözləri Ailə, Qadın və Uşaq Problemləri üzrə  Dövlət Komitəsinin 2024-cü il üzrə Məlumatının müzakirəsi zamanı Milli Məclis Aparatının Sosial qanunvericilik şöbəsinin müdiri Adil Vəliyev deyib. 

“İnsanlar ilin ilk 5 ayında sürətlə evlənir, qeyri-rəsmi nikaha girir. Ötən gün xəbərlərdə də gördük ki, Sabirabadda 15 yaşında evlənən və 16 yaşında öldürülərək meyiti Kür çayına atılıb. Mətbuat nümayəndələri 15 yaşında evləndirilən qızla bağlı ailəyə sual verirlər, amma onlar sadəcə cinayətdən danışır, “ailədə belə şeylər olur” deyirlər. Şüurda inqilab hələ də baş tutmayıb. Mənə maraqlıdır Komitə iyul ayından hansısa monitorinq və başqa sahələrdə işlər görüləcəkmi? Yoxsa biz Cinayət Məcəlləsində daha sərt qanunların müzakirəsi haqqında danışmalı olacağıq?", - o qeyd edib.

Ailə, Qadın və Uşaq Problemləri üzrə Dövlət Komitəsi sədrinin müavini Sədaqət Qəhrəmanova isə öz növbəsində vurğulayıb ki, Komitə olaraq yerlərdə işlər davamlı aparılır:

"Gender məhsul şəxslərlə hər il seminarlar, treninqlər həyata keçiririk. Biz bələdiyyələri bu işə daha çox cəlb etmək istəyirik və bununla bağlı komissiya da yaratmışıq. Amma onların necə fəaliyyət göstərəcəyi sual atındadır. Yerli icra hakimiyyətləri bu işdə maraqlı olmalıdır. Biz burada qanunu, dəyişikliyi müzakirə edirik, bundan sonra da hər bir deputat olaraq seçicilərlə görüşəndə mövzunu qaldırmaq, tədbir keçirərək bizə kömək edə bilərsiniz. Biz komitə olaraq əlimizdən gələni edirik. Baxmayaraq ki, biz seminarlar keçirik, amma yerli icra hakimiyyətləri bizə cavab göndərəndə deyirlər, heç kim məişət zorakılığına məruz qalmayıb".