Mayın 28-də, Müstəqillik Günündə əlamətdar hadisə baş verdi. Üç qardaş ölkənin - Azərbaycan, Türkiyə və Pakistanın liderləri üçtərəfli sammit keçirmək üçün Laçına toplaşdılar.
Pakistanın baş naziri Şahbaz Şərif bir gün əvvəl Laçına gəldi. Prezident İlham Əliyev və Şahbaz Şərif arasında keçirilmiş görüşdə Azərbaycan ilə Pakistan arasında ticarət-iqtisadi əlaqələrin genişləndirilməsi, elm, təhsil və yüksək texnologiyalar sahələrində əməkdaşlıq məsələləri ətrafında ətraflı fikir mübadiləsi aparıldı. Növbəti gün isə Rəcəb Tayyib Ərdoğanın Laçına endi. Türkiyə liderini İlham Əliyev qarşılayıb, sonra hər iki dövlətin başçıları Laçın Beynəlxalq Hava Limanının təntənəli açılış mərasimində iştirak ediblər.
Və nəhayət, günün ikinci yarısında dövlət başçılarının iştirakı ilə üçtərəfli sammit keçirilib. Qeyd edək ki, bu görüş ilk dəfə deyil, Qazaxıstanın paytaxtı Astanada 2024-cü il iyulun 3-də Şanxay Əməkdaşlıq Təşkilatının 24-cü sammiti zamanı təməli qoyulan ənənənin davamıdır.
Həmin sammitdə xüsusilə vurğulanıb ki, Azərbaycan, Türkiyə və Pakistan bir-birinə tarixi-dini köklərə, qardaşlıq münasibətləri ilə bağlıdır. Ölkələrimizin beynəlxalq təşkilatlar çərçivəsində bir-birini daim dəstəklədiyi bildirilib və bunun gələcəkdə də davam etdirilməsinin vacibliyindən danışılıb.
Milli Məclisin deputatı Kamran Bayramov Modern.az-a açıqlamasında bildirib ki, üç ölkə liderinin builki görüşdəki bəyanatları da dövlətlərimiz arasında qardaşlıq əlaqələrini möhkəmləndirmək qətiyyəti ilə zəngin olub.
Zirvə görüşünü açan Azərbaycan Prezidenti İlham Əliyev deyib: “2020-ci ildə 44 günlük Vətən müharibəsinin ilk günlərindən etibarən Türkiyənin və Pakistanın ölkəmizə göstərdiyi siyasi və mənəvi dəstəyə görə bir daha minnətdarlığımızı bildiririk. Azərbaycan da öz növbəsində daim Türkiyənin və Pakistanın yanında olub. Bu gün biz bir daha xalqlarımızın birliyini təsdiqləyirik”. İlham Əliyev çıxışında digər məsələlərlə yanaşı, üç ölkə arasında müdafiə sahəsində əməkdaşlığın vacibliyini də vurğulayıb.
Deputat xüsusi vurğulayıb ki, üç qardaş ölkənin liderlərinin görüşünün otuz ilə yaxın işğal müddətində işğal olunmuş ərazilərlə işğalçı Ermənistan arasında əsas əlaqənin həyata keçirildiyi, üçüncü ölkələrdən arzuolunmaz qonaqların gəldiyi bir məkanda keçirilməsi dərin rəmzi xarakter daşıyır.
Bakının ardıcıl və barışmaz siyasəti ona gətirib çıxardı ki, əvvəlcə 2023-cü il aprelində Laçın rayonu ərazisində Ermənistanla şərti sərhəddə sərhəd-keçid məntəqəsi yaradıldı, sonra isə həmin il sentyabrında bir günlük parlaq anti-terror tədbirləri nəticəsində Azərbaycan öz suverenliyini tam bərpa etdi, işğalçı ordunun qalıqları isə elə həmin Laçın sərhəd-keçid məntəqəsi vasitəsilə Ermənistana qaçdı.
Kamran Bayramov əlavə edib ki, üçtərəfli sammit Laçını işğal rəmzindən qurtuluş, yeniləşmə və qüdrət rəmzinə çevirdi. Azərbaycan, Türkiyə və Pakistan dövlət başçılarının Laçında keçirilən görüşü dünyaya köhnə dünyanın dağıntılarından çıxan yeni güclü ittifaqın, beynəlxalq münasibətlərdə yeni qlobal gücün tam formalaşdığını göstərdi.
