Milli Məclisin Hüquq siyasəti və dövlət quruculuğu komitəsinin sədri Əli Hüseynli parlamentin bugünkü plenar iclasında “İcra məmurları haqqında”, “İcra haqqında” və “Ədliyyə orqanlarında qulluq keçmə haqqında” Azərbaycan Respublikasının qanunlarında dəyişiklik edilməsi barədə layihəni təqdim edib.
Modern.az-ın məlumatına görə, o bildirib ki, bu layihələr kifayət qədər əhəmiyyətlidir və ədliyyə orqanlarında həyata keçirilən islahatların yeni mərhələsi ilə bağlıdır.
Əli Hüseynli qeyd edib ki, məsələ komitə iclasında çox geniş müzakirə olunub:
"Mövcud problemlər açıq şəkildə müzakirə edilib və onların həlli yolları barədə düşünülüb. Onu qeyd etmək istəyirəm ki, hazırda icra xidmətinin səmərəli və məhsuldar fəaliyyətinin nəticəsində faktiki olaraq son dövrlər məhkəmə qərarlarının əhəmiyyətli hissəsi tam və manesiz icra edilib. 2024-cü ilin statistikasını götürsək, icra olunmuş işlər son 5 ilin ən yaxşı göstəricisidir. Faktiki olaraq ötən il 270 minə yaxın iş icra olunub. Əlbəttə, çox müsbət tendensiyadır. Bir neçə sahədə islahatların sürətlənməsi buna səbəb olub. İlk olaraq elektron informasiya sistemi daha da yeniləşdirilib. Elektron Hərrac Portalı istifadəyə verilib. Bu da ona imkan verir ki, həm borclu, həm də tələbkar hərraca çıxarılan məhsulun satışını tam şəffaf şəkildə müşahidə edə bilsin. Sonda hər iki tərəf bundan razı qalsın. Onu da qeyd etmək istəyirəm ki, vaxtilə cənab Prezidentin fərmanında da olduğu kimi hazırda Ədliyyə orqanlarında xüsusi icra məmuru strukturunun təşkili üzərində də işlər gedir. Bu qanun layihəsi də söylədiyimiz bu fikirlərin davamını və sürətlənməsini nəzərdə tutur".
Əli Hüseynli təkliflərdən yeni qanun layihəsində irəli sürülən təkliflər barədə də danışıb:
"Qanun layihəsində ədliyyə orqanlarının xüsusi xəzinə hesabının yaradılması nəzərdə tutulur. Yəni bütövlükdə ədliyyə orqanlarında müxtəlif sahələrdə əldə olunan vəsaitlərin hamısının həm şəffaflığının təmin olunması, həm də vahid hesabda toplanması bu qanunda nəzərdə tutulub. Könüllü olaraq qərarı icra etməyən fiziki və hüquqi şəxslərin cəriməsinin miqdarının artırılması nəzərdə tutulur. Bu, qərarın icrasının sürətli və könüllü həyata keçirilməsini təşviq edəcək. Əks halda bu, əlbəttə xoşagəlməz hallara gətirib çıxara bilər. İcra məmuru qulluğuna qəbulla bağlı ali hüquq təhsil tələbinin götürülməsi tələb olunur. Bu təklif tərəfimizdən komitədə də çox geniş müzakirə olundu. Statistikaları dinlədik. O statistikalar olmasa da, komitəmizin də mövqeyi ondan ibarət idi ki, bu təklif yerindədir. Məhkəmə qərarının icrasını həyata keçirən mencerə peşə fəaliyyətində xüsusi hüquq təhsilinə ehtiyac görünmür. Hesab edirəm ki, belə bir düzəliş oradakı boş vakant yerlərə digər ali təhsilli şəxslər cəlb olunmasına xidmət edəcək.Biz bu yanaşmanı qəbul edirik. Hesab edirik ki, ədliyyə orqanlarının bu istiqamətdə islahatları düzgün yoldadır. Bütövlükdə qanun layihəsi ilə bağlı rəyimiz müsbətdir. Hörmətli həmkarlardan bu mütərəqqi layihəni dəstəkləmələrini xahiş edirik".
