“Bakı Ekspo Mərkəzində Bakı Enerji Həftəsi çərçivəsində keçirilən 30-cu Beynəlxalq Xəzər Neft və Qaz Sərgisi və 13-cü Xəzər Beynəlxalq Energetika və Yaşıl Enerji Sərgisi Azərbaycanın enerji potensialına və enerji layihələrinə artan beynəlxalq marağı və inamı əks etdirir. Yubiley tədbirində yeni iştirakçılar və milli pavilyonlarla yanaşı, 30 ölkədən 200-dən çox şirkətin iştirakı Bakı Enerji Həftəsinə artan beynəlxalq maraqdan xəbər verir. Bakı Enerji Həftəsi yeni çağırışlarla ayaqlaşmaq və inovvativ həllər tapmaq həmçinin məlumatlar mübadiləsi və imkanların təqdimatı baxımından mühüm platformaya çevrilib. Enerjinin gələcəyini formalaşdırmaq üçün hökumətləri, qlobal şirkətləri və sənaye ekspertlərini bir araya gətirərək dünyanın ən nüfuzlu layihələrindən olan Bakı Enerji Həftəsində keçirilən sərginin rəsmi açılış mərasimində Prezident İlham Əliyevin nitqi, o cümlədən yubiley tədbiri ilə bağlı dövlətimizin başçısına ünvanlanan təbriklər, çıxışlar Azərbaycanın bu gün dünyanın enerji xəritəsində və enerji təhlükəsizliyinin təmin olunmasında artan rolunun təsdiqidir. Prezidentin təşəbbüsü ilə yaradılan enerji layihələri bu gün öz əhəmiyyətinə və miqyasına görə qlobal xarakter alıb”.
Bunu Modern.az-a açıqlamasında Milli Məclisin deputatı Tahir Mirkişili bildirib.
Onun sözlərinə görə, Bakı Enerji Həftəsinin Azərbaycanın enerji sektoru və bütövlükdə beynəlxalq ictimaiyyət üçün əhəmiyyəti olduqca böyükdür: “1994-cü ildə ulu öndər Heydər Əliyevin rəhbərliyi ilə Azərbaycan qlobal enerji səhnəsinə ilk addımlarını atıb. İlk dəfə keçirilən Xəzər Neft və Qaz Sərgisi Azərbaycanın müasir enerji strategiyasının və qlobal enerji əməkdaşlığının dinamik rolunu əks etdirən, əsasını qoyan tarixi “Əsrin müqaviləsi”nin imzalanması ilə eyni vaxta təsadüf edib. Azərbaycanın enerji strategiyasının uğurlu nəticələrini şərtləndirən əsas faktor ölkə iqtisadiyyatın şaxələndirilməsidir. Dayanıqlı iqtisadi inkişafın təmin edilməsi üçün vaxtında bütün zəruri addımlar atılıb. Sirr deyil ki, Ulu öndər Heydər Əliyev tərəfindən əsası qoyulan milli enerji strategiyasının Azərbaycanın müstəqil iqtisadi əsaslarının yaranmasına və ölkəmizin inkişafına xidmət edib. Çünki məhz bu tarixi addımlar fonunda Azərbaycan müstəqil iqtisadi, siyasi iradə nümayiş etdirməyə başladı. Sözsüz ki, o dövr üçün bu cür strateji qərarların qəbul edilməsi böyük cəsarət və uzaqgörənlik tələb edirdi. Yenicə müstəqillik qazanmış Azərbaycan müəyyən daxili gərginliklərdən yenicə xilas olmuş, Ermənistan hərbi təcavüzü nəticəsində ərazilərinin 20 faizi işğal edilmiş, 1 milyona yaxın vətəndaşı öz ölkəsində qaçqın və məcburi köçkünə çevrilmişdi. Belə bir şəraitdə “Əsrin müqaviləsi”nin imzalanması, 1995-ci ildə isə müstəqil Azərbaycanın ilk konstitusiyasının qəbul edilməsi ulu öndər Heydər Əliyevin Azərbaycan xalqı və dövləti qarşısında ən böyük tarixi xidmətlərindəndir. Bu gün neft və qazın ölkənin Ümumi Daxili Məhsulda payı təqribən 30 faizdən çoxdur. Milli sərvətlərin ədalətli bölüşdürülməsi nəticəsində yoxsulluğun azaldılmasına nail olunub. Güclü ordu quruculuğu nəticəsində ölkəmizin suverenliyi tam bərpa olundu. İnsan kapitalına və təhsilə yatırılan maliyyə vəsaitləri gələcək rifahımızın sosial təminatı baxımından olduqca önəmlidir. Avrasiyanın vacib nəqliyyat qovşaqlarından birinə çevrilən Azərbaycan regionun enerji xəritəsinin yenidən formalaşmasında vacib rol oynayır. Azərbaycan öz tərəfdaşları ilə Xəzər dənizini Qara dəniz və Aralıq dənizi ilə birləşdirən strateji boru kəmərlərini inşa edib. Azərbaycanın dəniz yataqlarından İtaliyanın sahilinə qədər uzanan 3500 kilometrlik Cənub Qaz Dəhlizini nümunə göstərmək olar. Azərbaycanın yaşıl enerji gündəliyi də olduqca böyük əhəmiyyətə malikdir. Bu gün Azərbaycan xarici investorlar üçün olduqca cəlbedici ölkələrdəndir. Neft və qazla zəngin olan ölkənin xarici investorlarla birlikdə yaşıl enerjiyə sərmayə qoyması günümüzün tələbidir. Enerji infrastrukturuna yatırılan investisiyalar Azərbaycanın praqmatik siyasətinə etibarın artmasının nəticəsində mümkün olub. Vaxtilə Azərbaycanın etibarlı tranzit ölkəsi kimi potensialını düzgün qiymətləndirməyənlər bu gün yanıldıqlarını etiraf edirlər. Ölkəmiz COP29-un sədri olaraq bu istiqamətdə öz üzərinə düşən vəzifələri uğurla yerinə yetirir. Azərbaycanın uğurlu COP29 sədrliyi dövründə qəbul edilən qərarların “Bakı sıçrayışı” adlandırılması heç də təsadüfi deyil. Bu Azərbaycanın enerji bazarındakı məsuliyyətindən və imkanlarından xəbər verir”.
Millət vəkili onu da bildirdi ki, Azərbaycanın müasir və ədalətli enerji strategiyası təkcə ölkəmizin iqtisadi inkişafına səbəb olmur, həm də region ölkələrin iqtisadi gəlirlərinin artmasına töhfələr verir: “Açıq dənizə çıxışı olmayan Azərbaycan infrastruktur layihələrini uğurla icra etdiyi üçün tranzit imkanları günbəgün artır. Enerji layihələrimiz region xalqları arasında körpü rolunu oynayır. Azərbaycan təkcə enerji istehsalı və daşınması ilə məşğul olmur. Ölkəmiz geosiyasi sabitliyin formalaşmasında vacib rol oynayır. Enerji təhlükəsizliyinin möhkəmləndirilməsi, enerji təchizatının şaxələndirilməsi və yaşıl enerji üzrə davamlı inkişaf ölkəmizin əsas prioritetləri hesab olunur”.
