Bu ilki parlament seçkilərində namizədliyini 80 saylı İmişli-Beyləqan seçki dairəsindən irəli sürmüş Milli Məclisin deputatı Əhəd Əhmədovun namizədliyinin qeydə alınmaması rəsmən təsdiqləndi.
Modern.az saytı xəbər verir ki, bu barədə Mərkəzi Seçki Komissiyasının “Seçkilər” İnformasiya Mərkəzi rəsmi məlumat açıqlayıb.
Qeyd edək ki, imza vərəqələrini oktyabrın 1-dən DSK-ya qaytaran deputata oktyabrın 9-da rəsmən élan olunub ki, onun namizədliyindən imtina edilir. Deputat özü bir neçə gün öncə saytımıza açıqlamasında bildirmişdi ki, onu qeydiyyata almamağa heç kimin cürəti çatmaz. Amma görünən odur ki, Ə.Əhmədovun bu hədə-qorxuları bir nəticə verməyib.
Xatırladaq ki, Yeni Azərbaycan Partiyasının üzvü olan Əhəd Əhmədov 2005-ci ildə keçirilən seçkilərdə bitərəf kimi deputat mandatı qazanıb. 1991-ci ildən «Günəş» Elm-İstehsalat Assosiasiyasının direktoru, 1994-cü ildən Azərbaycan Kurortlar Birliyinin şöbə rəisi, 1996-cı ildən «Azəri» firmasının direktoru, 2000–2005-ci illərdə Füzuli rayon şərab zavodunun direktoru vəzifələrində çalışıb. Hazırda Milli Məclisin İqtisadi siyasət komitəsinin üzvüdür. Modern.az
