Milli Məclisdə deputatlar "qiyam" qaldırdılar
İnsan hüquqları üzrə Müvəkkilin (Ombudsman) səlahiyyətlərinin artırılması üçün “İnsan hüquqları üzrə Müvəkkil (Ombudsman) haqqında” Konstitusiya qanununa əlavə və dəyişikliklər ediləcək. Bu əlavə və dəyişiklikləri nəzərdə tutan qanun layihəsi isə Milli Məclisin (MM) Hüquq siyasəti və dövlət quruculuğu komitəsi ilə İnsan hüquqları komitəsinin dekabr;n 8-də keçirilən birgə iclasında müzakirə olunub.
Modern.az saytı xəbər verir ki, iclasda müzakirələr gərgin keçib. Millət vəkilləri Qüdrət Həsənquliyev, Fəzail Ağamalı və Fazil Mustafa dəyişikliklərin əleyhinə çıxıblar. Onlar bildiriblər ki, sözügedən qanunun bir şəxsə uyğunlaşdırılması düzgün deyil.
Milli Məclis Aparatının Dövlət quruculuğu üzrə qanunvericilik şöbəsinin müdiri Lətif Hüseynov qanun layihəsi barədə məlumat verərək bildirib ki, məlum əlavə və dəyişikliklər qanunvericilik təşəbbüsü ilə prezident İlham Əliyev tərəfindən parlamentə göndərilib:
“Milli Məclisin 2005-ci ildə qəbul etdiyi “İnformasiya əldə etmək haqqında” qanunda mətbuat üzrə Ombudsman institutunun yaradılması və ombudsmanın təyin edilməsi nəzərdə tutulurdu. Lakin indiyə qədər belə bir institut yaradılmayıb və ombudsman təyin olunmayıb. Hazırda qanuna təklif edilən əlavə və dəyişiklər bu səlahiyyətin indiki Ombudsmana verilməsini nəzərdə tutur. Avropada belə bir təcrübə var, məsələn, Sloveniyada da bu işi Ombudsman həyata keçirir. Əlavə və dəyişikliklər qüvvəyə minəndən sonra “İnformasiya əldə etmək haqqında” qanunun mətbuat üzrə ayrıca Ombudsman yaratmaq barəsində müddəası qüvvədən düşəcək. Çünki həmin səlahiyyətlər indiki Ombudsmana keçəcək”.
Parlamentin İnsan hüquqları komitəsinin sədri Rəbiyyət Aslanova deyib ki, 2005-ci ildə qəbul edilən “İnformasiya əldə etmək haqqında” qanunda nəzərdə tutulan informasiya azadlığı üzrə Ombudsmanı müəyyən səbəblərdən təyin etmək mümkün olmayıb: “Keçmiş deputat Rizvan Cəbiyev buna çox çalışsa da, mümkün olmadı. Bu, zamanla bağlı məsələ idi. Hesab edirəm ki, indi ayrı-ayrı qurumlar yaratmaqdansa, vahid qurumun olması daha yaxşıdır”.
Sözügedən Konstitusiya qanununa təklif edilən əlavə və dəyişikliklər bəzi deputatların sərt narazılığına səbəb olub.
Bütöv Azərbaycan Xalq Cəbhəsi Partiyasının (BAXCP) sədri, millət vəkili Qüdrət Həsənquliyevin sözlərinə görə, 2005-ci ildə qanun qəbul edilsə də, mətbuat üzrə Ombudsman institutunun yaradılması istiqamətində heç bir addım atılmayıb:
“Bu da bizim qanunlara olan münasibətimizi göstərir. İnformasiya azadlığı üzrə ayrıca institutun yaradılmaması, indi isə onun səlahiyyətlərinin hazırkı Ombudsmana verilməsi ilə mətbuat ombudsmanı institutu ideyasını bəri başdan öldürür. Biz bununla Azərbaycandan demokratiya, insan hüquqları və söz azadlığı sahəsində islahatlar tələb edən beynəlxalq təşkilatlardan canımızı qurtarmağa çalışırıq”.
Böyük Quruluş Partiyasının (BQP) sədri, millət vəkili Fazil Mustafa bildirib ki, əlavə və dəyişiklikləri qəbul etməzdən öncə “İnformasiya azadlığı haqqında” qanunda bununla bağlı müddəa ləğv edilməlidir: “Bunu etməmək qanunlara qeyri-ciddi yanaşmaq deməkdir”.
Müzakirədə iştirak edən ATƏT-in Bakı ofisinin nümayəndəsi Monika Meltes təmsil etdiyi qurumun rəyini açıqlayıb. O, bildirib ki, informasiya azadlığı üzrə ayrıca Ombudsman institutunun yaradılması daha yaxşı olardı:
“Bir halda ki, 2005-ci ildə qəbul edilən qanunda bu nəzərdə tutulub, mətbuat üzrə Ombudsman təyin olunmalıdır. Azərbaycanın hazırkı ombudsmanın səlahiyyətləri onsuz da genişdir. Mətbuat üzrə Ombudsmanın səlahiyyətlərinin ona verilməsi ombudsmanın özünə əlavə problemlər yaradacaq. Hesab edirik ki, mətbuat üzrə ayrıca Ombudsman olmalıdır”.
Ombudsman Elmira Süleymanovanın fəaliyyətini tənqid edən deputatlar bildiriblər ki, insan hüququları üzrə müvəkkilin indiyə qədərki fəaliyyəti qənaətbəxş sayıla bilməz.
Müzakirədə iştirak edən Ombudsman Aparatının rəhbəri Aydın Səfixanlı isə bildirib ki, Ombudsman Elmira Süleymanova indiyə qədər onsuz da informasiya azadlığı üzrə fəaliyyət göstərib: “İndiki dəyişikliklə onun səlahiyyətləri dəqiqləşdirilir ki, bu da müsbət haldır”.
Müzakirələrdən sonra sənəd Mill Məclisin plenar iclasına tövsiyyə olunub.
Modern.az
