Məktəbəqədər uşaq tərbiyə müəssələri - bağçalar özəlləşdirildikdən sonra təyinatı üzrə istifadə edilmir. Modern.az xəbər verir ki, bu barədə Milli Məclisin Elm və təhsil komitəsinin dekabrın 9-da keçirilən iclasında deputat Bəxtiyar Əliyev bildirib. Millət vəkilinin sözlərinə görə, uşaq bağçaları ilə bağlı ciddi problemlər mövcuddur. Belə ki, özəlləşdirilən uşaq bağçalarının təyinatı üzrə işləməməsi bu sahədə bir sıra problemlər yaradıb. Fəaliyyətdə olan bağçaların isə maddi –texniki vəziyyəti bərbad gündədir.
“İnsan kapitalı bağçalardan başlanır. Bu istiqamətdə ciddi addımlar atılmaldır. Məsələnin ictimailəşdirilməsi vacibdir”-deyə deputat qeyd edib.
Elm və təhsil komitəsinin sədri Şəmsəddin Hacıyev isə bildirib ki, deyilənlər doğrudur. Komitə sədri rəsmi statistikaya istinadən qeyd edib ki, bu gün uşaqların cəmi 17-20 faizi bağçalara gedir. “80 faizə qədər uşağın məktəbəqədər tərbiyə müəssələrindən kənarda qalması yaxşı göstərici deyil”-deyə Ş.Hacıyev bildirib.
Modern.az
