Millət vəkilləri «Mərasimlər haqqında» qanunun qəbulu məsələsini bir daha gündəmə gətirdilər
Dördüncü çağırış Milli Məclisin (MM) Mədəniyyət komitəsinin dekabrın 10-da keçirilən ilk iclasında «İnsanın immunçatışmazlığı virusunun törətdiyi xəstəliklə mübarizə haqqında» qanunun tətbiqi ilə əlaqədar bəzi qanunvericilik aktlarına dəyişikliklər və əlavələr edilməsi» və «İnsanın immunçatışmazlığı virusunun törətdiyi xəstəliyin (AİDS) yayılmasının qarşısının alınması haqqında» qanunun qüvvədən düşmüş hesab edilməsi barədə» və «Təhsil haqqında» qanunun tətbiqi ilə əlaqədar bəzi qanunvericilik aktlarına dəyişikliklər və əlaqələr edilməsi barədə» qanun layihələrinin müzakirəsi keçrilib.
Sözügedən komitənin sədri Nizami Cəfərov ilk öncə bildirib ki, üçüncü çağırış parlamentdən bir komitə olaraq onların gündəliyində yalnız bir qanun layihəsi - «Yaradıcı şəxslər və yaradıcılıq ittifaqları haqqında» qanunvericilik aktı qalır: «Bildiyiniz kimi, bizim bununla bağlı ayrıca qanunumuz yoxdur. Düzdür, ötən çağırış parlament dövründə biz bu yöndə qanun layihəsini birinci oxunuşda müzakirələrə çıxarıb onun qəbuluna nail ola bildik, ancaq sonradan müəyyən problemlər ortaya çıxdı. Bunun da səbəbi əsasən maliyyələşdirmə məsələsi ilə bağlı oldu. Biz həmin vaxtdan bugünədək çalışırıq ki, sözügedən qanun layihəsində bu məsələ öz əksini tapsın. Ancaq Maliyyə Nazirliyinin də mövqeyi ondan ibarətdir ki, sözügedən sənəddə maliyyələşdirmə ilə bağlı heç bir müddəa olmasın. Onlar hesab edirlər ki, sabah ikinci bir yazıçılar birliyi, 5-ci bir rəssamlar ittifaqı yarana bilər və bu zaman maliyyələşdirmə onların, daha doğrusu, dövlətin çiyinləri üzərinə düşər. Açığını deyim ki, biz vaxtilə sözügedən qanun layihəsini hazırlayarkən, müzakirələrə çıxararkən, birinci oxunuşdan keçirərkən burada cəmi 4 təşkilatı nəzərdə tutmuşduq. Lakin sonradan Teatr Xadimləri İttifaqı, Kinematoqrafçılar İttifaqı, Dizaynerlər Birliyi və sair, təşkilatlar da bu məsələdən, bu qanundan yararlanmaq istədiklərini ortaya qoydular. Ona görə, bu məsələ hələ də tam başa çatmayıb, nazirliklə müzakirələrimiz davam edir. Ancaq biz çalışacağıq ki, nəhayət, bu qanunun qəbuluna nail olaq». Bununla yanaşı, komitə sədri bildirib ki, istər ötən çağırış parlament dövründə, istərsə də müxtəlif vaxtlarda şou-bizneslə bağlı məsələləri tənzimləmək üçün ayrıca qanun layihəsinin qəbul olunması məsələsi də gündəmi məşğul edib: «Qeyd edim ki, biz bu məsələnin «Mədəniyyət haqqında» qanunla tənzimlənməsinin tərəfdarıyıq. Bu qanunun qəbulundan isə haradasa 15 ildən artıq vaxt keçir. İndi onun da xeyli təkmilləşdirilməsinə, yeniləşdirilməsinə ehtiyac var. Əgər belə olarsa, şou-bizneslə, eləcə də, mədəniyyətin digər sahələri ilə bağlı məsələləri tənzimləmək, daha məqsədəuyğun və effektli olar.
Sonra qanun layihələri barədə məlumat verilib. Birinci qanun layihəsində təklif olunur ki, dövlət və ictimai teleradio yayımçıları tərəfindən insanın immunçatışmazlığı virusu infeksiyasının profilaktikası barədə maarifləndirici verilişlərin, sosial reklam çarxlarının nümayişi üçün ayda 20 dəqiqədən az olmayan efir vaxtı ayrılmalı və həmin verilişlərin daha əlverişli vaxta yayımı təmin edilməlidir. İkinci qanun layihəsində isə təklif olunur ki, təhsil qanununun tətbiqi ilə bağlı bir sıra qanunvericilik aktlarındakı «tədris» sözü «təhsil», «ixtisasartırma kursları…» sözü «təhsil müəssisələri» sözü ilə əvəzlənsin.
Qanun layihələri ilə bağlı mövqeyini açıqlayan sözügedən komitənin üzvü, millət vəkili Jalə Əliyeva bildirib ki, insanın immunçatışmazlığı virusu infeksiyasının profilaktikası barədə maarifləndirici verilişlərin, sosial reklam çarxlarının nümayişi üçün ayda 20 dəqiqəlik vaxtın nəzərdə tutulması əslində çox azdır. Onun sözlərinə görə, bir ay 720 saatdan ibarətdir və indi onun cəmi 20 dəqiqəsinin bu cür reklam çarxlarının yayımlanmasına ayrılması düzgün deyil: «Hesab edirəm ki, burada bu müddətin artırılması çox vacibdir».
Millət vəkili sonra «Mərasimlər haqqında» qanun layihəsinin qəbulunun zəruruliyi məsələsini dilə gətirərək bildirib ki, artıq neçə illərdir bu məsələ dalana dirənib: «İnanın ki, istər toy, istərsə də yas mərasimlərində axıra qədər əyləşmək mümkün olmur. Hər ikisində həddindən artıq ifratçılıq, isrfaçılıq baş alıb gedir. Hər şey əndazəni ötüb keçib. Toylarda səsdən-küydən dayanmaq mümkün deyil, musiqi az qala adamın beynini deşsin. Ona görə hesab edirəm ki, nəhayət, bizim komitəylə Sosial siyasət komitəsi bu yöndə təkmil qanun layihəsini hazırlayıb ortaya qoymalı və onun qəbuluna nail olmalıdır». Millət vəkili həmçinin, «Dövlət dili haqqında» qanunun təkmilləşdirilməsinə böyük ehtiyac olduğunu bildirib : «Bu da artıq dövrün, zamanın tələbidir. Bu məsələdə də biabırçılıq baş alıb gedir. Ona görə yaxın gələcəkdə sözügedən qanuna da dəyişikliklər məsələsinə baxılmalıdır».
Sözügedən komitənin sədr müavini, professor Rafael Hüseynov isə bir sıra sahəvi qanunların qəlubuna ciddi ehtiyac olduğunu bildirib. O, qeyd edib ki, Azərbaycanın tarixi, mədəni yerləri, abidələri, qoruqları, konkret olaraq Göygöllə, İçərişəhərlə, o cümlədən, məzarlıqlarla, anım yerləri ilə bağlı qanunların qəbulu vacibdir.
Geniş müzakirələrdən sonra hər iki qanun layihəsi parlamentin plenar iclasına tövsiyə olunub.
Modern.az
