Bu gün Milli Məclisin İqtisadi siyasət komitəsinin iclası keçirilib. Modern.az-ın məlumatına görə, komitə sədri Ziyad Səmədzadə bildirib ki, qurumun qarşında duran vəzifələrdən biri Gömrük, Rəqabət və Bank məcələləri ilə bağlı qanun layihələrini müzakirəyə çıxarmaqdır.
Z.Səmədzadə deyib ki, ölkədə sahibkarlıq mühitinin yaxşılaşdırılması baxımından həmin sahədə monitorinqin aparılması, qarşıya çıxan nöqsanlarla bağlı məsələlərin aidiyyatı qurumların diqqətinə çatdırılması nəzərdə tutulur.
Deputat Vahid Əhmədov isə Rəqabət Məcəlləsinin qəbul olunmasının vacibliyinə toxunub. Bildirib ki, iqtisadi sahədə hökm sürən monopoliya vəziyyəti dünyanın heç bir ölkəsində Azərbaycandakı kimi deyil.
V.Əhmədov əhalinin keçmiş əmanət banklarında qalan pul vəsaitlərinin qaytarılması məsələsinin də vacibliyini önə çəkib və İqtisadi siyasət komitəsini bunun reallaşması istiqamətində hərəkətə keçməyə çağırıb. Deputat qeyd edib ki, prezidentin 26 oktyabr 2005-ci il tarixli “Azərbaycan Respublikası vətəndaşlarının keçmiş SSRİ Əmanət Bankının Azərbaycan Respublikası Bankında olan əmanətləri haqqında” sərəncamı var. Sərəncamla ölkə vətəndaşlarının 1 yanvar 1992-ci il tarixinə keçmiş SSRİ Əmanət Bankının Azərbaycan Respublikası Bankında olan əmanətlərinin indeksləşdirilməsinə hazırlıq aparmaq üçün Dövlət Komissiyası yaradılıb. Komissiyanın tərkibinə sədr baş nazir olmaqla nazirlər, bank və komitə sədrləri daxil edilib.
”Həmin sərəncamda əmanətlərin qalıqlarına kompensasiyaların verilməsini tənzimləyən müvafiq qanun layihəsinin və onların ödənilmə mexanizmi barədə təkliflərin hələ o zaman üç ay müddətində hazırlanması, eyni zamanda vətəndaşların 1 yanvar 1992-ci il vəziyyətinə əhali qrupları və yaş kateqoriyaları üzrə bank hesablarının inventarizasiyasının aparılması nəzərdə tutulub.
Sərəncamdan 5 il ötür, bəs əmanətlərin qaytarılma mexanizmi niyə hələ də müəyyənləşdirilməyib?” deyə V.Əhmədov bildirib.
Millət vəkili ölkədə qiymətlərin qalxmasının bazar iqtisadiyyatının tələblərindən irəli gəlmədiyini bunun süni yolla baş verdiyini vurğulayıb. V.Əhmədov deyib ki, Azərbaycanda bazar iqtisadiyyatı anarxiya ilə müşayiət olunur. O, çörəyin qiymətinin ehtiyac olmadığı halda qaldırılmasını buna nümunə göstərib və əhalinin narazılığını dilə gətirib.
Modern.az
