Bu gün Milli Məclisin İnsan haqları komitəsində dövlət qeydiyyatına alınmayan dini icmaların nümayəndələrilə görüş keçirilib. Modern.az xəbər verir ki, görüşdə komitə sədri Rəbiyyət Aslanova, komitənin sədr müavini Yevda Abramov, Qafqaz Müsəlmanları İdarəsinin sədr müavini Hacı Salman Musayev, Dini Qurumlarla İş üzrə Dövlət Komitəsinin hüquq şöbəsinin nümayəndəsi Səbinə Allahverdiyeva, İslam Universitetinin rektoru Hacı Sabir Həsənli, Dini Qurumlarla İş üzrə Dövlət Komitəsinin nümayəndəsi Səbinə Allahverdiyeva, o cümlədən, «Rəbbin məbədi», “Yeqova şahidləri”, «Mədh kilsəsi», Xristian İncil Babtist «Nur» dini icmasının nümayəndələri iştirak ediblər.
Görüş zamanı sözügedən icma rəhbərləri onların Dini Qurumlarla İş üzrə Dövlət Komitəsi tərəfindən dövlət qeydiyyatından imtina edilməsinin səbəblərini açıqlayıblar. «Rəbbin məbədi» xristian təmayüllü dini icmanın rəhbəri Rasim Həsənov bildirib ki, təmsil etdiyi dini icma 2006-cı ildə yaradılıb, Təsis sənədləri elə həmin ilin 22 may tarixində komitəyə təqdim edilməsinə baxmayaraq indiyə qədər dövlət qeydiyyatına alınmayıb. Buna səbəb kimi hüquqi ünvanın şəxsi mənzil göstərilməsi qeyd edilir: «Biz istəyirik ki, qanun çərçivəsində fəaliyyət göstərək. Azad və sərbəst şəkildə dini ayinlərimizi icra edək. Ona görə dini icmanın dövlət qeydiyyatına alınmasında maraqlıyıq». R.Həsənovun bildirdiyinə görə, «Rəbbin məbədi» özünə «Allahın Assambleyası» qurumunu dini mərkəz kimi qəbul edib, hazırda onlarla qardaşlıq münasibətindədir.
«Nehemiya» dini icmasının rəhbəri Rauf Hüseynov bildirib ki. 1993-cü ildə yaratdıqları dini qurum indiyə qədər qeydiyyata alınmayıb: «Hələ 2002-ci ildə bizə bildirdilər ki, özünüzə xaricdə dini mərkəz tapın. Bu tövsiyəyə də əməl edərək sənədlərimizi komitəyə təqdim etdik. Lakin indiyə qədər problemlərimiz həll olunmamış qalıb. «Dini etiqad azadlığı haqqında» qanunda edilən dəyişiklikdən sonra isə ümumiyyətlə, səndlərimizi qəbul etmirlər. Əsas gətirilir ki, dini icmanın təsisçisi olan 10 üzvündən 4-ü gedib. Ona görə təsisi sənədləri yenidən işlənməlidir».
Özünə dini mərkəz kimi «İsveç Həyat sözü» cəmiyyətini seçən «Mədh kilsəsi» icmasının rəhbəri Rasim Xəlilov qeyd edib ki, icmalarının 1500 üzvü var ki, onlardan 600-dən artığı Bakı şəhərindədir: «Cəmiyyətimiz 15 ildən artıq müddətdə fəaliyyət göstərməsinə baxmayaraq, onun dövlət qeydiyyatına alınmasından imtina edilib. Buna səbəb kimi hüquqi ünvanın düzgün göstərilməməsi və təsis sənədlərinin qanunauyğun tərtib edilməməsi göstərilir. Hazırda icmamız dövlət qeydiyyatına alınması məqsədilə məhkəməyə müraciət edib və işə apelyasiya məhkəməsində baxılır».
“Yeqova şahidləri” dini icmasının təmsilçisi Kirill Stepanov qeyd edib ki, texniki problemlər ucbatından sənədləri qanunvericilikdə nəzərdə tutulan müddətdə sözügedən komitəyə təqdim edə bilməyiblər. Buna səbəb komitədən vaxtında xəbərdarlıq edilməməsi olub. Bu səbəbdən onlar məhkəməyə müraciət etmək məcburiyyətində qalıblar.
Dini Qurumlarla İş üzrə Dövlət Komitəsinin təmsilçisi Səbinə Allahverdiyeva bildirib ki, təmsil etdiyi komitə heç bir dini icmaya qarşı ayrı-seçkilik etmir. Hazırda müraciət edən dini icmaların heç birinin qeydiyyatı ləğv edilməyib. Sadəcə, «Dini etiqad azadlığı haqqında» qanuna edilən əlavə və dəyişikliyə əsasən dini icmalar yenidən dövlət qeydiyyatına alınmalıdır. Bu məqsədlə dini icmalarla kifayət qədər izahat işi aparılmasına baxmayaraq, onların bəzilərinin sənədlərində müəyyən çatışmazlıqlar özünü göstərir. Konkret müraciət edən dini icmaların isə hüquqi ünvanları və təsisçiləri ilə bağlı problemləri var. Çünki dini icmalar daimi fəaliyyət göstərmək üçün özlərinə hüquqi ünvan müəyyən etməlidirlər. Onun bildirdiyinə görə, qanunazidd fəaliyət göstərən bəzi dini icmalar ölkəyə qadağan edilmiş dini ədəbiyyatlar gətirirlər. Bu səbəbdən hazırda "Yeqova şahidləri" ilə məhkəmə prosesi davam edir.
Parlamentin İnsan hüquqları komitəsinin sədri Rəbiyyət Aslanova dini icma rəhbərlərinə tövsiyə edib ki, yenidən qeydiyyata alınmaları üçün sənədlərini hazırlayıb Dini Qurumlarla İş üzrə Dövlət Komitəsinə təqdim etsinlər. R.Aslanova əlavə edib ki, sözügedən dini icmaların qeydiyyata alınma prosesi MM -in, şəxsən onun özünün nəzarətində olacaq və dini qurumların dövlət qeydiyyatına alınmaları üçün lazımi tədbirlər görüləcək: «Əgər 30-40 gün ərzində komitə tərəfindən əsaslandırılmış cavab verilməsə, prosesə müdaxilə edəcəyik. Ancaq o da faktdır ki, komitə istəyir ki, hər şey Azərbaycan qanunları çərçivəçində baş versin». Komitə sədri onu da bildirib ki, dini icmaların özlərinə mərkəz seçdikləri xarici qurumların fəaliyyəti araşdırılmalıdır: «Ola bilir ki, onlardan hansınınsa fəaliyyəti Azərbaycan xalqının və dövlətinin milli maraqlarına zidd olsun. Onsuz da Azərbaycana sağdan, soldan təsir etmək istəyən qüvvələr çoxdur. Belə olan halda, Azərbaycanın mill maraqlarına, adət-ənənlərinə zidd olan beynəlxalq dini qurumların ölkədə fəaliyyəti qadağan edilməlidir». R. Aslanova dediyinə görə, yaxşı olar ki, komitə dini icmalar üçün hüquqi maarifləndirmə sahəsində seminarlar təşkil etsin və nəticədə də sənədləşmə işlərində bu cür adi problemlər üzə çıxmasın: «Bir müddət öncə «Dini etqad azadlığı haqqında» qanuna bir neçə dəyişiklik edilib, ancaq dini qurumların bundan xəbəri yoxdur. Azərbaycan tolerant ölkədir, bütün dini qurumlara eyni münasibət göstərilir».
Parlamentin İnsan hüquqları komitəsinin sədr müavini Yevda Abramov isə insanların dini etiqadla bağlı seçim etməkdə azad olduğunu və ona heç kəsin müdaxilə etmək hüququnun olmadığını bildirməklə yanaşı, xüsusilə, müsəlman dininə mənsub olan bəzi insanların öz dini mənsubiyyətlərini dəyişməsini başa düşmədiyini də söyləyib: «Üzü Lev Tolstoydan bəri çoxları İslam dininin böyüklüyündən, əsrarəngizliyindən yazırlar, danışırlar. Çünki İslam dini səmavi dinlər arasında sonuncusu, ən təkmilidir. Ancaq mən başa düşə bilmirəm ki, İslam dininin daşıyıcısı olan bəzi insanlar nəyə görə sonradan başqa dini təmayüllərə meyl edirlər. Şəxsən mən başqa dinin - yəhudi dininin nümayəndəsiyəm. Ancaq gecə-gündüz Quranı oxumaqla məşğulam. Bununla belə, heç kəsin dini etiqad seçiminə də qarışmağım tərəfdarı deyiləm. Hər kəs bu məsələdə sərbəstdir».
Modern.az
