Maliyyə Nazirliyi bəyan edib ki, «Mühasibat uçotu haqqında» Qanununun 13.2-ci maddəsinə uyğun olaraq qeyri-hökumət təşkilatları maliyyə hesabatlarını Qeyri-hökumət Təşkilatları üçün Milli Mühasibat Uçotu Standartına uyğun tərtib etməlidir. Bu barədə Modern.az-a açıqlamasında Maliyyə Nazirliyi mətbuat xidmətinin rəhbəri Mais Priyev bildirib.
“Həmin Qanunun və "Azərbaycan Respublikasının bəzi qanunvericilik aktlarına əlavələr və dəyişikliklər edilməsi haqqında" Azərbaycan Respublikası Qanununun tətbiq edilməsi barədə" Prezidentin 2009-cu il 27 avqust tarixli 146 nömrəli Fərmanının icrasını təmin etmək məqsədi ilə Nazirlər Kabinetinin 25 dekabr 2009-cu il tarixli 201 nömrəli Qərarı ilə «Qeyri-hökumət təşkilatlarının illik maliyyə hesabatının forması, məzmunu və təqdim edilməsi Qaydası» təsdiq edilib. Bu Qaydanın 5.1-ci bəndinə əsasən, qeyri-hökumət təşkilatları illik maliyyə hesabatlarını hesabat dövrü başa çatdıqdan sonra növbəti ilin aprel ayının 1-dən gec olmayaraq, Azərbaycan Respublikası Maliyyə Nazirliyinə təqdim etməlidir”-deyə M.Piriyev bildirib.
Onun sözlərinə görə, Qeyri-hökumət Təşkilatları üçün Milli Mühasibat Uçotu Standartı və Nazirlər Kabinetinin 25 dekabr 2009-cu il tarixli 201 nömrəli Qərarı ilə təsdiq edilmiş «Qeyri-hökumət təşkilatlarının illik maliyyə hesabatının forması, məzmunu və təqdim edilməsi Qaydası» Nazirliyin rəsmi internet saytında (www.maliyye.gov.az) yerləşdirilib.
Yuxarıda sözügedən Qaydanın 3.1-ci bəndinə uyğun olaraq qeyri-hökumət təşkilatları üzrə illik maliyyə hesabatlarının komponentləri aşağıdakılardan ibarətdir:
- Maliyyə vəziyyəti haqqında hesabat. Forma № 1;
- Maliyyə fəaliyyətinin nəticələri haqqında hesabat. Forma № 2;
- Xalis aktivlərdə (kapitalda) dəyişikliklər haqqında hesabat. Forma № 3;
- Pul vəsaitlərinin hərəkəti haqqında hesabat. Forma № 4;
- Əhəmiyyətli uçot siyasəti və izahlı qeydlər.
Qeyri-hökumət təşkilatları tərəfindən tərtib etdilmiş maliyyə hesabatları elektron formatda Maliyyə Nazirliyinə təqdim edildikdə, bu hesabatlar Word, Exel, Adobe acrobat (PDF) formatlarında [email protected] email ünvanına göndərilə bilər.
Hesabatların tərtibinə dair məsləhət və texniki kömək almaq üçün hər gün Bakı şəhərində Azərbaycan Respublikasının Prezidenti yanında QHT-lərə Dövlət Dəstəyi Şurasına, rayonlarda isə Milli QHT- Forumunun Şirvan, Quba, Qəbələ, Mingəçevir və Regional QHT-lərin Resurs Mərkəzlərinə müraciət edilə bilər.
(Əlaqə telefonları: 404 46 99, daxili nömrələr 214, 253, 519, 163).
Modern.az
