Rusiya Xarici İşlər Nazirliyi Ermənistanın baş naziri Nikol Paşinyanın fikirləri və Qarabağ ətrafındakı vəziyyətlə bağlı bəyanat verib.
Modern.az Rusiya XİN-in rəsmi saytına istinadən bəyanatı təqdim edir.
Bildirilib ki, Ermənistan Respublikasının baş naziri N.V.Paşinyanın 24 sentyabr 2023-cü il tarixli müstəqillik mesajı Rusiyaya qarşı qəbuledilməz hücumları ehtiva edir və rədd edilməkdən başqa heç nəyə səbəb ola bilməz və sözügedən mesajda daxili və xarici siyasətdəki uğursuzluqlara görə məsuliyyəti Moskvanın üzərinə yıxmaq cəhdi var: "N.V.Paşinyanın son müddəaları Qərbdən ilhamlanan və rəsmi İrəvanın təkan verdiyi proseslərin, ölkəmiz və müttəfiqlik münasibətlərimiz üçün dağıdıcı proseslərin epizodik yox, sistemli xarakter daşıması ilə bağlı əvvəlki qənaətlərimizi təsdiqləyir".
"Hökumət başçısı faktiki olaraq etiraf etdi ki, bütün bu müddət ərzində respublika bilərəkdən Rusiyadan üz döndərməyə hazırlanırdı. Onların Ermənistanın inkişafı məqsədilə yeni Qərb vektoru təyin etmək üçün atdıqları addımlar Rusiya Federasiyası və KTMT-nin səhvləri ilə inandırıcı şəkildə əsaslandırılır. Eyni zamanda, unudulur ki, dövlətlərimizin təhlükəsizlik və inkişaf məsələlərində maraqları əsasən oxşardır və ABŞ və digər NATO ölkələri Rusiyaya nəinki strateji ziyan vurmağı, həm də ümumi sabitliyimizi pozmağı qarşılarına məqsəd qoyublar", - bəyanatda deyilir.
Bəyanata görə, Rusiya həmişə müttəfiqlik öhdəliklərinə sadiq qalıb, erməni dövlətçiliyinə hörmət edib və respublikanı heç vaxt "bizimlə və ya bizə qarşı" seçimi qarşısında qoymayıb: "Moskva qardaş Ermənistana təhlükəsizlik, iqtisadiyyat və mədəniyyət sahələrində genişmiqyaslı yardım göstərib və göstərməkdə davam edir. 2020-ci ilin payızında Rusiya Federasiyasının və şəxsən prezident V.V.Putinin səyləri Ermənistanın tam məğlubiyyətinin qarşısını almağa imkan verdi. Əgər N.V.Paşinyan həftələr əvvəl atəşkəsə razılaşsaydı, itki daha az ağır olardı. Nəhayət, Rusiya sülhməramlılarının Qarabağda bəzən öz həyatları bahasına olan fədakar fəaliyyəti Rusiyanın Azərbaycan və Ermənistan arasında sülhün əldə edilməsi naminə son dərəcə çətin missiyasını yerinə yetirməkdə davam edən öhdəliklərinin birbaşa təsdiqidir".
"Ölkəmiz Ermənistanda Rusiya şirkətləri üçün süni çətinliklərin yaradılması barədə getdikcə daha tez-tez siqnallar verməsinə baxmayaraq, Ermənistanla həm ikitərəfli, həm də Avrasiya İqtisadi İttifaqı çərçivəsində mütəmadi olaraq iqtisadi və investisiya əlaqələrini artırmaq kursunu davam etdirir. Bu gün rekord dinamika nümayiş etdirir, Ermənistan iqtisadiyyatının təsirli artımına və vətəndaşların rifahına töhfə verirlər. Ayrı-ayrı erməni nümayəndələrinin humanitar sahədə qarşılıqlı faydalı layihələrin gedişatını ləngitmək cəhdlərinə baxmayaraq, Rusiya Ermənistanla ümumi mədəni və təhsil məkanının möhkəmləndirilməsinin tərəfdarıdır", - deyə qeyd olunub.
"Regional məsələlərdə N.V.Paşinyan - Rusiya, Azərbaycan və Ermənistan liderlərinin 2020-ci ilin noyabrından Qarabağın statusu məsələsini gələcək nəsillərin öhdəsinə buraxmaq barədə centlmen razılaşmasına riayət etmək əvəzinə, Qərbin öyüd-nəsihətlərinə boyun əydi. Praqa və Brüsseldə Azərbaycanın Qarabağ üzərində suverenliyini tanıyan 1991-ci il Alma-Ata Bəyannaməsi əsasında hərəkət etmək qərarına gəldi. Bu, 9 noyabr 2020-ci il tarixli üçtərəfli bəyanatın imzalandığı şərtləri, eləcə də Rusiya sülhməramlı kontingentinin mövqeyini əsaslı şəkildə dəyişdi. Ermənistan rəhbərliyinin uzaqgörənliyi ucbatından Ermənistanın təhlükəsizliyinin möhkəmləndirilməsi sahəsində bir sıra sazişləri həyata keçirmək mümkün olmadı, xüsusən də N.V.Paşinyan altı ölkənin bütün xarici işlər nazirləri tərəfindən artıq razılaşdırılmış qərarı imzalamadı", - bəyanatda bildirilir.
"Vəziyyət həm də rəsmi İrəvanın Ermənistan silahlı qüvvələrinin 2020-ci il noyabrın 9-dan sonra Qarabağda mövcudluğunun davam etməsini israrlı şəkildə təkzib etməsi ilə də qızışıb və bu, sonuncu sentyabr eskalasiyasının əsas səbəblərindən birinə çevrilib. Sentyabrın 20-də Rusiya sülhməramlı kontingentinin vasitəçiliyi ilə yerdə qalan erməni birləşmələrinin çıxarılması və “Müdafiə Ordusu”nun ağır texnika və silah-sursat çıxarılmaqla tam tərksilah edilməsi ilə bağlı əldə edilmiş razılaşma real mənzərəni üzə çıxardı və bunun üçün ilkin şərtlər yaratdı. Əsasən Rusiya və Azərbaycanla birgə ritmik işdən çəkinib Qərbə tərəf qaçmağa üstünlük verən Ermənistan rəhbərliyinin qeyri-ardıcıl mövqeyi nəticəsində 2020-2022-ci illər üçün ən yüksək səviyyədə üçtərəfli sazişlər kompleksinin icrası dalana dirənib. Qiymətli vaxt itirildi, bu müddət ərzində Ermənistan üçün əlavə təhlükəsizlik faktoruna çevriləcək sülh müqaviləsinin razılaşdırılması, sərhədin delimitasiyası və regional kommunikasiyaların açılması baxımından əhəmiyyətli irəliləyiş əldə oluna bilərdi. Avropa İttifaqının himayəsi altında adıçəkilən Praqa və Brüssel görüşlərində Ermənistanın baş nazirinin Azərbaycanın ərazi bütövlüyünü tanımaqla yanaşı, Qarabağ ermənilərinin hüquq və təhlükəsizliyini xatırlamaması da diqqət çəkir. Bu gün də biz rəsmi İrəvanda Qarabağdakı aktual problemlərin həllinə kömək etməkdə güclü maraq görmürük - söhbət atəşkəsə riayət etmək, humanitar vəziyyətin yaxşılaşdırılması, Bakı ilə Xankəndi (bəyanatda qondarma "Stepanakert" ifadəsi istifadə olunub - red.) arasında davamlı dialoqun qurulması üçün əlverişli şərait yaradılmasından gedir", - Rusiya XİN-in bəyanatında deyilir.
"N.V.Paşinyan komandasının bu məsuliyyətsiz yanaşması erməni cəmiyyətinin bir hissəsinin başa düşülən narazılığına səbəb olub və bu, xalq etirazlarında ifadə olunub. Təbii ki, onların Rusiyadan ilham alması ilə bağlı iddiaların reallıqla heç bir əlaqəsi yoxdur. Ermənistan hökumətinin başçısı yaxşı bilməlidir ki, Moskva belə şeylərlə məşğul olmur - “rəngli inqilablar” təşkil etməkdə kifayət qədər mahir olan Qərbdən fərqli olaraq. Lakin qəribə təsadüf nəticəsində İrəvandakı hakimiyyət orqanları tərəfindən etirazçıların təqib olunması ilə bağlı çoxsaylı faktlara diqqət yetirməmək qərarına gəlib. Eyni zamanda, məlum olduğu kimi, ABŞ səfiri hökumətlə sıx əlaqə saxlayır. Bütün bunların fonunda, açıq-aşkar hakimiyyətin təhriki ilə erməni mətbuatında əsl anti-Rusiya vakxanaliyası üzə çıxıb. Əminik ki, İrəvan rəhbərliyi qəsdən Ermənistanla Rusiya arasında çoxşaxəli və çoxəsrlik əlaqələri pozmağa və ölkəni Qərbin geosiyasi oyunlarının girovuna çevirməyə cəhd edərək çox böyük səhvə yol verir. Əminik ki, Ermənistan əhalisinin böyük əksəriyyəti bundan xəbərdardır", - deyə qeyd olunub.
