Azərbaycanın hər yerində Yeni il şənlikləri keçirilir. İşğaldan azad olunan torpaqlara köç edən keçmiş məcburi köçkünlər dədə-baba torpaqlarında təzə ili qeyd edir. Bu il isə Şuşada bayram qeyd edən əhalinin sayı daha da artıb. Bu da öz növbəsində şəhərin yenidən canlanmasına, illərdir işğal altında saxlanılan torpaqlarımızda bayram ovqatının daha da çoxalmasına zəmin yaradıb.
Şuşada Yeni il ab-havası haqqında Modern.az-a danışan Şuşa sakini, jurnalist Kərim Kərimli qeyd edib ki, Yeni il ab-havası Şuşada artıq hiss olunmaqdadır. “Şəhərin bir çox yerində yolkalar, bayrama aid dekorativ bəzək əşyaları da qurulub. Mərkəzdə qədim tarixə malik Güllü park deyilən yer var, tarixən bura bayram tədbirlərinin keçirildiyi, Şuşaya gələn ziyalıların, sənətkarların, xarici qonaqların görüş yeri də olub. İndi burada dekabrın ortalarından yarmarka açılıb və təxminən yanvarın ortasına qədər yarmarkanın fəaliyyəti davam edəcək. Yarmarkada müxtəlif əl işləri, yerli məhsulların satışı həyata keçirilir. Burada bayram müddətində musiqilikonsert tədbirlərinin keçirilməsi də nəzərdə tutulub”.
İllər sonra Şuşada bayram qeyd edəcəyin də bildirən Kərim Kərimli vurğulayıb ki, bu il müxtəlif yerlərə dəvət alsa da bayramı doğma şəhərində qeyd etməyi hər şeydən üstün hesab edib:
“2024-cü ildə Şuşada bayram qeyd edənlərin sayı təxminən 1500 nəfəri əhatə edəcək. Bu ilk ilk dəfə işğaldan azad edilmiş doğma Şuşa şəhərində bayramı qeyd edənlərin siyahısında bizim ailə də var. Bizim ailəmizin sonuncu dəfə Şuşada Yeni ili 1991-ci ilin dekabrın 31-dən 1992-ci ilə keçdiyimiz il olub. Ancaq o vaxt Yeni il ab-havası yox idi. Çünki dekabr ayından etibarən dalbadal bir neçə faciələr yaşandı. Dekabrın 15-i Gəmirli kənd, dekabrın 23-ü Meşəli kəndi, dekabrın 28-i isə Xankəndinə bitişik olan, ən iri yaşayış məntəqələrindən biri hesab olunan Kərkicahan qəsəbəsi yandırılıb işğal olundu. Çox saylı insan təlafatı olduğu üçün həmin dövrdə Yeni il ab-havası yox idi. Yavar ayında da ardıcıl faciələr baş verdi. Bu qədər ağrılı günlər, illərlə işğaldan sonra yenidən Şuşada bu cür ab-hava ilə bayram qeyd etmək çox gözəl hisdir”.
