Prezident İlham Əliyev fevralın 19-da Xankəndiyə səfər edib. Burada Prezident Zəfər parkının təməlqoyma mərasimində, eləcə də Xankəndidə “Bulud” hotelin açılış mərasimində iştirak edib.
Ümumi sahəsi 5325 kvadratmetr olan hotel beş mərtəbədən ibarətdir. Hoteldə 45 nömrə var və 91 qonaq qəbul edə biləcək. Müasir iaşə məkanlarının yaradıldığı hoteldə “Lobby lounge”, kafe, açıq və qapalı restoranlar fəaliyyət göstərəcək. Hoteldə 50 nəfər işlə təmin olunub.
Bu hotelin açılışı Türkiyə Prezidenti Rəcəb Tayyib Ərdoğanın 2021-ci ildə Şuşaya səfəri zamanı ölkə başçısı İlham Əliyevlə dialoqunu bir daha gündəmə gətirib. 4 il bundan öncə iki dövlət başçısı arasında belə maraqlı dialoq yaşanıb:
İlham Əliyev iki dağın arasından görünən Xankəndi şəhərini Ərdoğana göstərərək deyib:
- O iki dağın arasında görünən yer Xankəndidir.
R.T.Ərdoğan: Hotel oradadırmı?
İlham Əliyev: Xeyr, xeyr. Amma orada da olacaq.
Xocalının deputatı Elman Məmmədov Modern.az-a açıqlamasında bildirib ki, Xankəndidəki hotelin açılışı bir daha Prezidentin uzaqgörən siyasətindən və planlarından xəbər verir:
“Çox hörmətli prezidentlər - Azərbaycan Prezidenti cənab İlham Əliyev və Türkiyə Prezidenti cənab Rəcəb Tayyib Ərdoğan Şuşada möhtəşəm tədbir zamanı həmsöhbət olmuş və maraqlı anlar yaşamışdı. Cənab Ərdoğan əlini uzadıb Xankəndi isiqamətinə “hotel ordamı” dedi. Cənab prezidentimiz gülərək dedi ki, “xeyr, amma orada da olacaq”. Yəni bu nə deməkdir? O dövrdə bu açıqlanmırdı. Amma indi bunu açıqlamaq lazımdır. Bu o demək idi ki, cənab Prezidentimiz hələ o dönəmdə də, 44 günlük Vətən Müharibəmizin başa çatması ərəfəsində belə torpaqlarımızın hamısının, eləcə də Xankəndi və Xocalının işğaldan azad edilməsini nəzərdə tuturdu. Bu gün bu uzaqgörən plan mərhələ-mərhələ həyata keçirilir. Xankkəndi də “Bulud” hotelin açılışı, Zəfər parkının təməlqoyma mərasimi, ondan sonra Xocalı rayonunun Ballıca kəndinə qayıtmış bir qrup sakinlərlə görüş, Prezidentin onlarla həmsöhbət olması - bunlar hamısı cənab Prezidentin uzaqgörən planlarından və siyasətindən xəbər verir”.
E.Məmmədov söyləyib ki,qələbəmizin başlanğıcı 2003-cü ildə İlham Əliyev Prezident seçiləndən başlayıb və addım-addım həyata keçirilib:
“Bu gün biz onun nəticəsini görürük. Hər birimiz , bu uzaqgörən planların və siyasətin öz təsdiqini tapmasından fəxr edir və sevinirik. Cənab Prezident həmişə “mən nəyi, nə zaman və necə etmək lazım olduğunu bilirəm” deyir. Bəli, hər şeyin vaxt var. Ballıcada sakinlərlə görüşəndə də, Xocalıda görüş vaxtı da 44 günlük Vətən Müharibəsi başa çatandan sonra da mən həmişə düşünürdüm və diqqətdə saxlayırdım ki, Xocalını işğaldan azad etməmiş qələbəmiz tam olmayacaq. Və bunu etdik. Eşq olsun Prezidentimizə, müzəffər Ali Baş Komandanımıza, eşq olsun ordumuza, Azərbaycan xalqına”.
