Xocalı soyqırımının ildönümü yaxınlaşır. İnsanlıq tarixinin ən dəhşətli faciələrindən biri olan bu qətliam zamanı 613 Xocalı sakini qətlə yetirilib.
Xocalı artıq işğaldan azad edilib və şəhər öz sahiblərinə qovuşub. Böyük Qayıdış çərçivəsində Xocalının Ballıca kəndinin sakinləri doğma yurdlarına da qayıdıblar.
Lakin işğal dövründə Xocalı sakinlərinin bir çoxu Azərbaycanın müxtəlif bölgələrində dəfn olunub. İndi isə həmin şəhid məzarlarının doğma torpaqlara köçürülməsi məsələsi gündəmdədir.
Modern.az-a danışan Milli Məclisin Xocalıdan olan deputatı Elman Məmmədov bildirib ki, Xocalı şəhidlərinin o vaxt əsas dəfn yeri Ağdam olub:
“Ağdam şəhərinin mərkəzində iki yerdə məzarlıq olub. Bu qəbiristanlıqdan biri Ağdamdan Xocalı istiqamətinə çıxış yerində olub. O vaxt 1941-45-ci il müharibəsi ilə əlaqədar kompleks vardı. Onun yanında böyük Şəhidlər xiyabanı salındı. Orada sadəcə Xocalı şəhidləri yox, o zaman Ağdamda şəhid olanların əksəriyyəti dəfn olunmuşdu. Ağdama qarşı təhlükə yaranıb, o tərəfə getmək çətin olanda Ağdam Bərdə arasında Uzundərə adlanan yerdə ikinci Şəhidlər xiyabanı salındı. İndi gələcəkdə dövlət rəhbərimizin bu məsələ ilə bağlı fikri, eyni zamanda Xocalı əhalisi olaraq bizim elə fikrimiz olsa, artıq o dövlət rəhbərliyi qarşısında qaldırılacaq. Nə məsləhət olacqsa, o da olacaq. Burada özfəaliyyətə, özbaşınalığa yer vermək olmaz. 2024-cü ilin fevralın 26-da cənab Prezident Xocalıda Soyıqırımı memorialının kompleksinin təməlqoyma mərasimini keçirtdi. Gələcəkdə elə bir şey nəzərdə tutulsa, yəqin dövlət səviyyəsində olacaq”.
Deputat vurğulayıb ki, məzarların köçürülməsi məsələsində rəhbərliyin fikri əsas olacaq:
“Xocalı işğaldan azad edildikdən sonra il ərzində bu günə qədər bir neçə dəfə qalıqları tapılan şəhidlərimizin hamısını Xocalıda dəfn etdik. Xocalı qəbiristanlığında şəhidlər üçün yer ayrıldı, elə ora da şəhidlər xiyabanıdır. Eyni zamanda Xocalı işğal edildikdən sonra öldürülmüş mülki əhalinin bir neçəsinin dəfni də Xocalı şəhərində oldu. Dediyimiz məsələdə əhalinin istək və arzusu nəzərə alınmalıdır. Eləcə də rəhbərliyin fikri də əsas olacaq”.
