XX əsrdə bəşəriyyətə qarşı ən dəhşətli hadisələrdən olan Xocalı soyqırımının 33 ili tamam olur. Soyqırımı nəticəsində 63-ü uşaq, 106-sı qadın, 70-i qoca və qarı olmaqla - 613 nəfər Xocalı sakini qətlə yetirildi, 8 ailə tamamilə məhv edildi, 130 uşaq valideynlərindən birini, 25 uşaq hər iki valideynini itirib. 

İllərdir “Böyüməyən uşaqlar” kimi xatırladığımız 25 uşaq bu gün böyüyüb və onlardan bəiləri artıq Xocalının ilk sakinləridir.

Soyqırımında hər iki valideynini itirənlərin içərisində Yasəmən və Əfsanə Hüseynova, onların qardaşı Murad Hüseynov da var. Hüseynova Yasəmən Tofiq qızı 1980, bacısı Əfsanə 1981, qardaşı Murad isə 1983-cü ildə doğulublar. Onların üçü də Bakıda məskunlaşıblar.

Yasəmən Hüseynova Modern.az-a açıqlamasında bildirib ki, Xocalı bu gün azaddır və bu xoşbəxtliyi bizə yaşadan Prezidentimiz İlham Əliyevə, şəhidlərimizə və qazilərimizə həmişə minnətdar olacağıq:

“Mən ilk növbədə Prezidentimiz İlham Əliyev cənablarına, şəhidlərimizə minnətdaram. Çünki onlar bizim ana-atamızın, əmilərimizin, bibilərimizin qanını yerdə qoymadılar. Allah qazilərimizin canını sağ etsin, onları heç vaxt unuda bilmərik. Biz həmin gecə hər iki valideynimizi və bütün doğmalarımızı şəhid vermişik, amma mən bu gün özümü yenə də xoşbəxt sayıram. Çünki mənim şəhidlərimin ruhu 2023-cü ildən bəri şaddır, onlar da bu azadlığı hiss edir, duyur, bilirlər ki, torpağımız erməni tapdağı altından azad edilib".

Yasəmən xanım deyir ki, onun üçün Xocalıya qayıtmaq çox çətindir:

"Çünki hər kəs istəyər ki, ata yurduna, ana vətəninə gedəndə onu əzizləri qarşılasın, amma çox təəssüflər olsun ki, biz onları 33 il əvvəl elə o torpaqlarda şəhid verib, vətəndən getmək məcburiyyətində olmuşuq. Mən şəhid verdiyim yaxınlarımın 33 ildir ki, Xocalıda səslərin, nəfəslərin duya bilmirəm, həmin gün qədər əzizlərim – nənəm, babam, əmi, xala, xalamın iki övladı şəhid oldu. Mənim yeganə təsəlli yerim atamın qəbridir o da Şəhidlər xiyabanındadır. Xocalıda bu gün qazıntı, bərpa işləri getdikcə torpağın altında kütləvi məzarlıqlar tapılır. Bir ümidim var ki, anamın da məzarı olsun. İnşallah da arzularıma çatacam. Bu faciədən 33 il keçib, bu gün o faciənin şahidi olanların əksəriyyəti artıq dünyada yoxdular. Arzum buna baxmayaraq, nə olursa olsun Xocalı faciəsinin unudulmamasıdır, biz də nəvələrimizə danışaq, onlar da öz övladlarına. Xocalı sadəcə 26 fevral günü xatırlanan hadisə olmamalıdır, Xocalı hər gün yada düşməli, nəsildən-nəsilə bu günlər öyrədilməli, aşılanmalıdır”.

Xatırladaq ki, Yasəmən Həsənovanın atası  Tofiq Hüseynov öz həyatını Xocalı şəhərinin mühafizəsinə qurban verib. O, göstərdiyi qəhrəmanlığa görə, Milli Qəhrəman adını alıb.

Onun anası isə həyat yoldaşını görmədən evlərini tərk etməyib və ermənilər tərəfindən  güllələnib.

Yasəmən özü həmin dəhşətdən donaraq, güllə yağışı altında gecə səhərədək yol qət etməklə xilas ola bilib.